絲絲講場：Fb朱仔身家暴漲 一度睇齊股神
根據彭博億萬富豪指數數據顯示，截至星期四美股收市計算，全球最大社交網站Facebook（Fb）創始人兼CEO朱克伯格（朱仔）副身家已經達到813億美元，睇嚟好大機會趕過股神巴菲特。事實上，喺星期四美股嘅交易時段，朱仔副身家就曾經追平股神，同為816億美元。
Fb星期五早段股價報200.02美元，跌0.74%，相反巴郡A股股價則報286,500美元，升0.53%，即係朱仔副身家仲係落後股神一啲。
巴菲特坐擁6364億
睇番現時全球最有錢嘅億萬富豪排行榜，位居首富嘅仍然係亞馬遜創始人貝索斯，而微軟創始人蓋茨同埋股神巴菲特就緊隨其後，佢哋三個人嘅身家分別為1,430億美元、930億美元同埋816億美元（約6,364億港元），繼而就到第四位嘅朱仔。
全靠Fb股價勁升
之不過，星期三嗰日Fb股價曾經升咗2.3%，帶挈朱仔身家增加咗17億美元！同股神副身家只係相差2,900萬美元，遠低於翌日嘅3億美元。
眾所周知，朱仔嘅Fb代表新經濟嘅高科技，而股神嘅投資旗艦巴郡則代表傳統舊經濟，唔通想發達真係要靠高科技先得？不過朱仔認真值得畀個Like佢嘅，事關佢今年先滿34歲，相比起股神巴菲特今年已經年屆88歲。絲絲真係不禁感嘆一句：「後生可畏！」
余絲韻