近日內地新登場嘅「獨角獸」A股搶盡散戶眼球，電動車電池商寧德時代（300750.SZ）更係新經濟嘅寵兒，佢上星期一喺深圳交易所創業板首日掛牌後日日勁升，即使尋日深圳創業板整體瀉5.76%，佢嘅股價仲可以勁升一成升到停板。
一眾股東如寧德時代創始人兼大股東曾毓群、副董事長兼股東黃世霖及天華超淨（300390.SZ）董事長裴振華，躋身財富淨值百億富翁。曾毓群與黃世霖身家增至約333億及152億元（人民幣‧下同）。
寧德時代首掛當日股價升44%，隨後五個交易日幾乎日日升10%而漲停板（內地A股市場有價格限制，股價與前一個交易日收市價唔可以超過10%嘅升跌幅，否則要停板，停板後非完全停交易，喺漲跌停價位或該價位內仍可以Trade得），尋日收報58.3元，總市值升至1,266.5億元。
余絲韻