絲絲講場：李寧姪仔升執董人工勁加1.3倍
呢排上市企業二代紛紛上場！運動品牌李寧（02331）尋日公布，30歲嘅非執董李麒麟調任為執董，佢舊年十二月中先成為公司非執董，事隔半年，就坐正做執董。呢位李生原來係公司執行主席兼代理行政總裁李寧嘅姪仔，亦即係公司主要股東李進位公子。明晒！原來係「企二代」。
李麒麟獲調任執董，由尋日生效，任期三年，年薪由21.5萬人仔加到50萬人仔，月薪有成4.1萬人仔，加幅成1.32倍！
玖紙副董事長年僅26歲
講起「企二代」，點可以唔提紙業女王張茵個仔！早排玖龍紙業（02689）公布，董事長張茵與副董事長劉名中嘅細仔Ken Liu，獲委任執行董事兼副董事長。
公告提到，Ken Liu今年26歲，以優等成績畢業於哈佛大學政府學系，仲曾經喺四大國際會計師樓之一羅兵咸永道擔任兩年顧問。佢一六年三月起喺美國中南（玖紙最大之廢紙供應商之一）擔任副主席。
Ken Liu董事袍金連工資，每年有成40萬美元，對比張茵外甥張連鵬舊年獲委任為非執董嘅每年董事袍金72萬人仔，果然係親生仔重要啲！
余絲韻