Market Insight：內需股吼回吐吸納

睇番港股昨日只係十點前波幅較大外，其餘時間波幅甚窄，炒即市搵食艱難。不過，既然上落市格局明顯，資金自然炒股不炒市，故見抖完氣的教育股及內需股已重新發力。

統一累積升幅不少

講起內需消費股，不得不提華潤啤酒（00291），股價除受惠於傳統銷售旺季外，今年仲有世界盃效應。美銀美林剛發表報告調升潤啤目標價至42.6元，重申其「買入」評級，主要睇好潤啤產品價格上漲、產能優化及有併購機會。走勢上，集團股價自三月開始拾級而上，相信世界盃期間仲有機會升多浸，值得睇位跟進，目標價43元，失守35元止蝕。

另外，其他食品股如統一企業（00220）、康師傅（00322）及中國旺旺（00151）近期均處強勢，統一更創逾五年新高。若單睇統一往績市盈率達38倍，當然唔平，但睇走勢今轉唔衝上10元關都未必會回頭。基本面方面，行業業績均見好轉，其中統一去年業績賺8.78億元人仔，按年勁升44%，加上今年首季業績保持強勢，稅後利潤按年升約47%，難怪吸引到資金青睞。

策略上，雖然話統一業務及股價皆向好，但查實自年初至今股價已累升44%，如果有貨當然可以坐多陣，博見10元關，若然無貨，宜待回試20天線約8.7元水平承接再作部署。

華潤水泥（01313）亦係昨日市場焦點，集團發盈喜的同時亦公布配股集資，成為昨日股價急跌近13%之原因。呢次潤泥伸手，令市場擔心陸續有來，故即使其他水泥股如中國建材（03323）、海螺水泥（00914）及亞洲水泥（00743）早前業績表現都幾好，但股價個別發展，好似債務較重的中建材昨日亦要跌1.7%，可見投資者心水幾清！

海螺下站目標55元

若想入市，梗係揀龍頭股海螺水泥，既受惠於水泥價格上漲，加上股價近幾個月拾級而上，短期整固後只要企穩50元關，下一站最少可睇55元。

教育股抖完一輪後，又再起哄。新高教集團（02001）昨日創新高升13.3%，中國新華教育（02779）升7%，至於兩隻半新股澳洲成峰高教（01752）及中教控股（00839）勝在無蟹貨，昨日分別升13.8%及7.2%。

整個板塊成上落市況中的異數，講到尾皆因內地教育尤其是對高等教育需求殷切，內地父母又捨得畀錢，加上學費年年加，基本面無乜好再講。不過，股價升到呢啲位，依家至追貨怕唔怕高位出現震倉，就真係要諗清楚。

古勝