絲絲講場：理文李運強父親節前分身家
又有「李氏家族」分身家喇！今次係著名造紙商理文系大股東，現年約78歲嘅李運強！佢尋日就透過聯交所發通告，將手持大部分股權以「零代價」及「饋贈」方式轉讓畀三個仔。
長子孻仔進身百億富豪
睇番理文造紙（02314）同理文化工（00746）兩份通告，李運強將手持56.88%股權嘅理文造紙部分股權送畀由李運強配偶黃惠娟的長子李文俊（47歲），其股權由原本6.35%增至30.47%，部分則送予弟弟李文斌（37歲），其股權由6.93%增至28.32%，李運強則保留11.38%。以理文造紙尋日市值約395億元計，李文俊及李文斌「分身家」後，持股總值分別達120億元同111億元，一下子進身百億富豪。
二仔化工持股增至六成
至於由衛少琦所生的二子李文恩（40歲），就獲李運強「送贈」理文化工股份，持股由33.75%增至60%，以股權角度睇，之後成間公司都係二仔話晒事，李運強只保留15%股權。以理文化工尋日市值約54億元計算，李文恩持股總值約32億元。
李氏三位公子獲得廿四孝老竇「送大禮」，睇番個日曆，今個禮拜日就係父親節，唔使講都識做啦！
余絲韻