絲絲講場:港交所多搞作小加忙到爆

呢排香港交易所(00388)好多搞作,數數手指,差唔多每兩個禮拜到就有一單大型研討會或者酒會之類活動,行政總裁李小加同主席史美倫曝光率高之餘,職員簡直忙到無氣抖!

港交所繼五月中舉辦LME(倫敦金屬交易所)亞洲年會晚宴,筵開153席,邀請逾1,900人出席後,上個禮拜五又搞咗「極高規格」嘅內地經濟改革開放40周年研討會,請內地猛人來港出席。

唔夠兩個禮拜後,港交所下周三又會舉行上市18周年酒會,喺生日酒會早一日前仲有個人民幣定息及貨幣(FIC)論壇舉行。

周年酒會移師自家大會堂

絲絲仲未數完,到七月初又到債券通開車一周年,跟住同月又有首隻「同股不同權」(WVR)公司小米喺香港同內地上市,香港咁難得至有WVR公司上市,肯定又有一番慶祝活動,難怪港交所職員喺暑假前應該會忙到無氣抖。

自從港交所金融大會堂今年二月開幕,由於冇咗交易大堂,地方寬敞咗好多,港交所好多自家活動都喺金融大會堂搞,好似即將舉行嘅18歲生日酒會,以往都喺酒店舉行,今年就移師到金融大會堂,感覺仲親切!

余絲韻