股神巴菲特一向唔妥虛擬貨幣，早排話Bitcoin係老鼠藥！虛擬貨幣忠粉索性抽股神句柴台「金句」水賺錢！
上個月初，股神喺佢投資旗艦巴郡股東會，再警告唔好掂虛擬貨幣，話Bitcoin係「老鼠藥乘二次方」，即係話毒都唔夠，直頭係「乘二次方」咁嚴重。
同場嘅股神副手芒格再辣啲，話虛擬貨幣係「Turd」（Turd係乜？絲絲覺有啲不雅，自己查字典），仲話買賣虛擬貨幣嘅人有「認知障礙」添！
轉個頭，搞緊虛擬貨幣化電商平台嘅ECoinmerce創辦人陳凱即刻食住上，為股神柴台金句「老鼠藥乘二次方」設計成Logo，印上T恤同咖啡杯喺網上賣，話等啲Bitcoin忠粉着住件Tee可以好自豪咁宣示信念喎！你想宣示埋一份，唔該每件承惠19.99美元至39.99美元。
講到宣示，有人更高調，虛擬貨幣挖礦公司Genesis Mining直頭喺巴郡寫字樓附近，搵個大廣告牌「唱」股神，大大隻字話股神早排亦自認睇錯咗冇投資亞馬遜等科技股，質問股神今次會否亦睇錯Bitcoin咁話！唔知股神日日返工睇到會點？大家準備定花生。
余絲韻