Market Insight：國指比重調整 提供機會

世盃開鑼 股市例靜？

「特金會」有轉機，中興通訊（00763）恢復營運露曙光，加上本周又係期指結算，恒指昨日先跌後回升，升204點報30,792點。藍籌中，升得最勁係中石油（00857），升逾6%；而舜宇光學（02382）及瑞聲科技（02018）升幅介乎3至4%；友邦保險（01299）、吉利汽車（00175）及濠賭股都有發力，可惜係成交得843億元，不足以定論後市方向。

下月中世界盃開鑼，傳統話畀股友聽，大家都去睇波，股市會更靜。陰謀論話此前大戶可能盡量會托住指數，完成部署淡倉就殺落一浸，然後睇波兼抖暑。不過，如今港股經已「轉莊」，即由以往外資芬佬主導到變成今時今日由北水主導，咁世盃行情會唔會有例外？反正投資並冇一本通書睇到老，見機行事。

市況去向未明，惟受惠於世界盃舉行的個股還是先炒一步，如啤酒類股份。青島啤酒（00168）股價升4.6%，華潤啤酒（00291）升5.9%。世界盃效應再加埋天時暑熱又係銷售旺季，都無謂估頂。至於體育用品股會唔會接力再炒一轉，見到現時估值普遍都唔平，古勝選擇做旁觀者。

粵投潤地值得留意

國指加入10隻紅籌同民企股，完成五個階段調整後比重上限會增至10%，首階段比重上限2%已於三月五日生效，第二階段增至4%會在六月四日生效。睇番嗰十隻新貴，以三月二日收市價至今最多累升幅度介乎3.8至50%，其中石藥集團（01093）最多累升逾五成，接下來按次分別是中國燃氣（00384）及中海油（00883），最多累升34%及31%，表現最差的係中移（00941），期內股價最多僅升3.8%。

周五收市前指數基金可能又做嘢，雖然預期相關個股未至於會好大反應，惟此前仍可以留意，如粵海投資（00270）同華潤置地（01109）。

古勝