Market Insight:炒生育政策見好要收

周初港股好消息升唔起,喺假期期間原來貿易糾紛仲有手尾跟。周三復市的港股走晒樣,大跌市成交不減反增,股民無乜心水倒不如提早抖暑好過。

美國總統「侵侵」從商往績唔算得上好,但經歷今輪中美貿易角力,其討價還價的能力恐怕再無人懷疑。人人都話打貿易戰無贏家,「侵侵」也是心知肚明,趁中美去年2,700億美元順差借題發揮,趁機攞着數幾乎係人所共知。既要為年多前支持佢大美國主義的選民找數,順便為年底國會中期選舉助選,也同時可以向唔支持佢的美國人顯示出佢講得出做到得的一面,對他而言,可謂一石三鳥。

大戶採取逆向思維

中美拳來腳往近三個月,期間港股無再插穿二月低位29,129點,反映其實大戶心裏有數,預咗中美講口唔講手。既然無驚過,又何來高興,港股連續兩日反高潮,其實睇番轉頭,三個半月以來,港股低位29,129點,高位是三月的31,978點,中間啱啱係30,553點,昨日恒指收市價仍然高出過百點。

同舊年單邊大升市好唔同,上落市追破位好容易輸死人,大戶採取逆向思維入市,大家興高采烈佢食胡,你以為個市跌穿三萬點就會萬劫不復?三月至今個市已經六次證明你係錯,走去買熊仔沽期指,猶如唔用繩去玩笨豬跳一樣。

中國落實喺七月一日開始下調汽車及汽車零件進口關稅,汽車進口關稅由最高25%降至15%,減幅四成,零件進口關稅則劃一下調到6%。消息利好汽車代理股,永達汽車(03669)升6.3%,和諧汽車(03836)升5.6%。

儘管減幅在市場預期之內,部分近期超賣的汽車股也趁壞消息出盡見反彈,分別有同寶馬及賓馳在中國合作的華晨中國(01114)同北京汽車(01958),就分別升5.4%及2.2%。但如果同四月國家領導人在博鰲論壇首次提及減關稅時前股價17.12元及9.54元相比,仲係跌緊12.5%及17.7%。基於減關稅後,進口車競爭優勢增加,國產及合營車利潤受損在所難免,短期的反彈,應是坐緊艇的股民落車機會。

雅士利不復當年勇

有消息話,內地全面取消生育限制,奶粉及教育股昨日坐咗火箭一樣,統統成為逆市奇葩。最搶眼有H&H國際(01112)升4%,雅士利國際(01230)升6.5%,楓葉教育(01317)升3.9%,宇華教育(06169)則升3.2%。

古勝領教過一三年中國放寬一孩政策,開始轉向單獨二孩,記得雅士利短短時間累升五成六見5.46元創歷史新高,到措施實施時,經已氣氛不再。如今四年過去,現時雅士利股價只得當日高位四成唔夠。

同看官溫故知新,只係想話畀大家聽,小孩唔係話生就生得出,睇單獨二孩推咗咁耐,出生率根本無回升到,而大部分教育股同奶粉股估值唔講得上便宜,記住見好要收。

古勝