絲絲講場：鷹君羅老太母親節唔多開心
唔知大家剛剛母親節過成點呢？不過鷹君集團（00041）羅氏家族大家長羅杜莉君（羅老太）好似就唔係過得幾開心嘞。
羅家孻仔羅啟瑞尋日喺佢旗下公司股東會之後見傳媒，兩度哽咽咁講咗媽媽嘅苦況，話母親節前一日羅老太堅持唔使大家幫佢做節，於是正日羅老太就獨自留喺酒店房。「你估佢等咩呢？佢好錫嘅仔女同子孫去咗邊度呢？」。
戶口解封有錢畀律師費
其實自從發生家族爭產風波之後，羅氏家族就分成兩大陣營。羅啟瑞表示，最終只得佢、二哥羅旭瑞與二姐羅鴻鏇同媽媽慶祝，唔支持媽媽取回羅氏家族信託基金資產嘅陣營就冇出現。
羅啟瑞又話，媽媽嬲仔女唔會多過五分鐘，希望仔女放低爭拗，做應做嘅事。
羅老太告滙豐國際信託案下周二正式開審，羅啟瑞話媽媽嘅工商銀行戶口終於解封，可以攞錢畀律師費。不過呢兩日仍有家族成員騷擾媽媽，話媽媽攞唔返啲資產。羅啟瑞希望對方自重，又勸其他兄姊回頭是岸。
余絲韻