絲絲講場：吉汽主席放牛悟管理之道

佢又話，想做牛，係因為只要有草食，佢本人就好幸福。又話牛食草落肚，擠出嘅係奶，好有「價值貢獻感」咁話。

餵飽就聽話 締雙贏

李書福對牛咁有感覺，有段古。佢阿爸係農民，李書福小學時，逢暑假都去放牛賺零用，於是悟出一番道理。佢話同牛溝通，彈琴梗唔得，但佢有方法，就係日頭餵飽牛，夜晚幫牛驅蚊，牛滿意就聽話，畀佢騎上牛背睇書學習，咁就雙贏。絲絲聽落，仲唔係管理之道！

得嗰八、九歲仔，又生得矮，點爬上牛背騎？佢諗到方法，就係先拖隻牛去啲草生得特別茂盛嘅位，等牛低頭掛住一味食，就發力抓住牛頸上。嘩，直頭係上位之道！

點解佢講起牛？其實係佢早幾日喺內地媒體自述創業生涯，佢高中未畢業就創業，問阿爸借幾百蚊買咗部相機，周街兜搭人影相賺錢，之後仲開埋照相館，做咗兩年佢就「轉型」，收舊電器喺屋企搞金屬回收。競爭大咗，佢就轉搞生產雪櫃配件，搞搞吓變成生產成個雪櫃同製冷設備，繼而研究生產電單車，就咁創辦咗「吉利」。故事之後嘅發展，已經唔使絲絲多講。

老老實實，畀着你，想做隻牛，定係騎牛嗰個呢？

余絲韻