Market Insight：醫藥板塊趁調整儲貨

大笨象滙豐控股（00005）升就無份，跌就預埋佢，上周五出季績無驚喜，隨即成為淡友群起而攻之對象，拖埋個市失守三萬點關，恒指跌386點收報29,926點，成交千億唔夠。踏入五窮月，恒指破唔到50天線不特止，掉轉頭要跌354點。

大笨象未必彈得起

滙控首季純利30.86億美元，按年跌1.4%，每股盈利15美仙，派第一次股息10美仙。自一三年以來，大笨象首三季各派息10美仙傳統無變過，股價難逃一跌，皆因回購計劃銀碼得20億美元，唔及樂觀券商的估計。

技術上，滙控四月時股價曾落過72.4元，穿一穿250天線拗腰反彈，經上周五一跌，距離74元的250天線差距唔夠1蚊。近排長短債息愈走愈近，上周四美國多間大型銀行股價全部見過今年新低，散戶至愛的滙控，小心今次若再穿250天線，未必咁好彩可以翻到身。

雷聲大雨點小，挾653倍超額認購之勢上市的平安好醫生，勢估唔到60元樓上的暗盤價全日見都未見過，最終勞動保薦人在54.8元築起血肉長城，先不至於失威到首日「破發」。以1.5厘孖展息計，頭槌飛每股息口成本差不多5.3元，連本帶息要60.1元，反觀全日高位不過58.7元，作為今年新經濟股的試金石，都算肉酸。

中短期而言，對孖展新股客肯定構成不利心理影響，隻小米仲可唔可以霸氣到叫價1,000億至1,200億美元上市？睇好醫生咁嘅情況，恐怕唔太樂觀。

上星期美國貿易代表團訪華結束，全城消息滿天飛，不過由代表團回國與美國總統「侵侵」會面後，「侵侵」周末發推特話中國被寵壞，即將公布的決定會令中國感到困難（hard for China），條件可能比預期辛辣。本來上周五晚美股勁升，但在貿易戰陰霾下，港股只怕未必能夠跟足預託證券計價指數達300多點的升幅，今日朝早大家要留意。

送完紅股隨時炒過

上周五恒指公司公布季檢結果，恒指成分股換入石藥集團（01093），踢走聯想集團（00992），後者無得留低早在預期之內，石藥更成為第一隻藍籌藥業股。上周五其實兩隻市值過千億元的醫藥股，包括石藥同中國生物製藥（01177）都逆市做好，反映兩股偷步炒染藍是各有捧場客。

至於今日復市，石藥因為指數基金要追貨的關係，升是意料中事，反而如果中生製藥返回10天線16.4元附近，可以撈番佢，博佢六月初二送一紅股除淨後，變相拆細再炒過。

古勝