絲絲講場：天保送岩石牛超重手！
天津港保稅區（海港）能源營運商天津天保能源（01671）尋日首掛，例牌上市公司都會送贈紀念品畀港交所（00388），咁到底天保能源送咩？咪就係一隻牛！
牛就成日見，呢隻特別在係用疊層岩整！岩石整嘅梗特別重手，連上市委員會委員葉禮德都話好重呀！而疊層岩雕刻品係天津名產。
牛仔寓意牛氣沖天，咁隻牛係咪會帶挈天保股價升唔少？原本都係，早段炒高近18%，去到2.24元高位就逐步回落，尾市跌穿埋招股價，收1.79元，較招股價低5.79%。未計手續費，散戶每手帳蝕220元。結果，沖喜只係益咗港股升272點，但天保就破底囉！
余絲韻