絲絲講場：格力一姐開出對象條件
珠海格力電器啱啱公布咗去年年報及今年首季業績，公司舊年淨賺224億元人民幣，按年增長45%，創下歷史新高；而今年首季亦有個好開始，淨賺55.8億元人民幣，按年增長39%，作為董事長嘅董明珠自然居功至偉！
所以話，格力電器又點可以冇珠姐呀，最新消息就話，原本今年五月底任期將會屆滿嘅珠姐，已經獲得格力電器新一屆嘅董事提名資格。即係話喺五月三十一日即將召開嘅格力電器股東大會上，珠姐好大機會獲提名，連任格力電器董事長。
董明珠：最緊要有Feel
之不過，就快64歲嘅珠姐其實有冇諗過退落嚟，同另一半享受人生呢？珠姐一向係女強人，似乎冇諗過退休，更何況珠姐仲係單身，最近罕有地講起擇偶條件同點睇愛情。原來，喺珠姐眼中，婚姻唔係必需品，對於另一半主要係要有感覺，即係要有Feel咁話！
珠姐慨嘆︰「有時候人家看上我，我又看不上人家，而有時候我看上人家，人家又未必看上我。主要原因我工作太忙！」
至於喜歡乜嘢類型男士，小鮮肉、大隻型男定成熟穩重人士？珠姐都係嗰句：「要有感覺，沒有定性喜歡哪一類型，有都是騙你的！」
余絲韻