Market Insight：內需板塊慎防揀錯股

今年沙特阿拉伯要用高價賣仔，在沙特阿美上市前，國際油價好似矮仔上樓梯咁級級攀升，已直指70美元關。黑色黃金漲價，牽動環球通脹預期升溫，加埋美國超額賣債的推波助瀾下，令十年期美債孳息率四年來首次升穿3厘關口。

政治風險未見紓緩

美鈔成本基本就只有紙張與油墨，從以往歷史，真係印幾多都得。理論上，美國破產風險極低，亦因為咁，持有十年期美債回報，向來被基金視為無風險的基準回報。在孳息率由一六年底位1.33厘，輾轉衝上昨日見3厘水平，換句話講，買債坐定定每年有3%回報。

在債息向上，金融市場風險配置必然會出現洗牌。其實過去48小時的美股同港股跌市，實在已較古勝估計來得遲。回帶睇番，今年二月美債息曾高見2.94厘，華爾街對「破三」其實早有心理準備，只因中美貿易戰消息拖債息回落咗一陣。

其實，息口去向易估，政治因素的風險先難猜。後市最睇唔透係美國針對中興通訊（00763）的制裁後，中方點去回應。近排內地媒體吹到話蘋果公司手機可能在中國禁售，如果玩到咁大，唔炸散後市就有鬼，魚缸客持盈保泰，短期控制一下注碼為宜。

中美貿易爭拗持續，一度成為資金避風港的內需股，表現榮辱互見。二、三月見公司密密回購的中國旺旺（00151），終於修成正果，股價連升六日，昨日再升4.1%收報7.25元，只要行多步，升穿一月高位7.34元，圓底走勢成形，有機會炒上8至8.5元之間。

之不過，唔係隻隻內需股都咁好彩，高盛出報告話萬洲國際（00288）首季業績唔對辦，尤其美國業務差過預期，雖然仲係維持買入評級，但目標價降至10.7元。淡友一呼百應下，萬洲昨日重挫9.5%收報7.8元。

空軍瞄準恒安攻擊

生產紙巾及衞生產品的恒安國際（01044），啱啱以1,166萬歐元（約1.116億港元），入股芬蘭紙漿公司Finnpulp（芬漿）。瑞信出報告唱淡，話睇唔到恒安急切需要投資低增值上游業務，交易亦嫌與與投資者溝通不足，就係因為咁，直接把評級由跑贏大市降至跑輸大市，對藍籌基金股嚟講都算少見，目標價由105元降至63元。

昨日恒安跌3.1%收報68.5元，股價見七個月新低。其實一單1億多元收購，竟可令市值一日蒸發27億元！再睇近排恒安沽空唔細，成件事更似有心人借機發圍。不過，依家市況風高浪急，股份高估值同時見沽空異動，都係要小心啲。

古勝