絲絲講場：恒生一姐點搵人生首份工？

現今畢業生有搵工App

話說恒生最近同聖雅各福群會合作，推出一個叫做「I am ...」手機App，幫年輕人搵工。講開，Louisa就回想起當年大學主修政治科學（Political Science），畢業時都好迷茫，烏下烏下唔知自己條路應該點行。

佢仲話當時互聯網仲未普及，逢星期六都要特登買份報紙剪低求職廣告，唔似依家咁方便可以用手機隨時上網搵工。後來佢搵大學嘅職業輔導中心規劃一下自己嘅職業生涯路線，發現自己原來想加入國際公司擴闊視野，最後選擇咗從事金融行業。

原來Lousia喺恒生「擔大旗」做一姐前轉過幾次公司，慶幸每位同佢相處過嘅上司同事都好友善令佢成長唔少，依家先有能力攀上恒生銀行行政總裁，佢形容生活已經「好幸福」。

Lousia話，直到今時今日都同自己講「我依家仲後生」，先有動力去迎接新挑戰。事實上，Lousia已經係有史以來最年輕嘅「女大班」！

佢希望即將踏入職場嘅後生仔唔好怕失敗，唔可以任由自己一直撞板，遇到困難時一定要主動提問，即使第一份工做得唔開心，仲有無限青春去闖出一片天！

余絲韻