絲絲講場：騰訊打工皇帝年薪4.7億

「股王」騰訊控股（00700）一七年年報顯示，薪酬最高嗰位薪酬接近4.78億元，即日均賺近131萬元！係主席馬化騰酬金4,593.7萬元人民幣嘅八倍以上，亦係總裁劉熾平酬金2.37億元人民幣嘅1.61倍！究竟係邊個？

嗱，騰訊一五年薪酬最高嗰個人賺近2.74億港元，當時坊間流傳係「微信之父」微信事業群總裁張小龍。再睇一六年公司公布最高嗰份人工變成近3.11億元，而期間又無人賺2.74億元，即係話九成係佢加人工啦。

到一七年，公司最高嗰份人工已經變成4.78億元，而微信用戶更有增無減，一七年仲直撲10億戶大關，大行個個都話有大把變現潛力，照道理張小龍無理由要減人工，咁嗰4.78億元會唔會係佢袋呢？

另一方面，內地一直流傳話張小龍起初唔願意由廣州落去騰訊嘅深圳總部開例會，結果馬化騰派專車去接佢，張小龍先無得推咋，可見馬化騰幾咁重視佢呢！

余絲韻