絲絲講場：馮志堅想去大灣區賣奶茶
金銀業貿易場永遠名譽會長馮志堅退休後，與有「茶王」之稱嘅羅德師傅合作搞咗間港式奶茶店「我杯茶」，開業三個幾月以來生意唔錯，就連Alan譚詠麟都嚟幫襯過兩次，仲吸引到金融界同黃金界大量「茶精」與「茶友」幫襯！
馮志堅話，佢哋打正港式奶茶鴛鴦專門店旗號，除咗最出名係奶茶外，若配番件沙嗲牛肉蛋治就最正，皆因佢哋不計成本採用鮮牛肉，講到絲絲都流晒口水！佢哋依家本港得一間分店，但馮志堅話未夠喉，諗住再喺本地開多一兩間分店。
不過，由於香港租金皮費太貴，長遠都會向內地發展，計劃喺近期最炙手可熱嘅大灣區設立基地，開兩三間自己經營嘅店舖，然後再成立培訓中心訓練沖泡奶茶技術嘅人才，下一步再用加盟商形式拓展業務。果然有晒計劃喎！
望做到自家品牌上市
見近期「天仁茗茶」經營商賓仕國際（01705）上市反應理想，馮志堅都希望有朝一日佢哋做到個品牌可以上市！
余絲韻