絲絲講場：領飛CEO溫兆華與首鋼續前緣

○八年助入股福山國際

講起有段古，原來Wilson同首鋼集團早有淵源，當年為首鋼入股首鋼福山資源（00639）牽紅線，幫企業「空手入白刃」收購煤礦資產，係佢投資銀行生涯最得意嘅一宗交易！

Wilson憶述喺○八年金融海嘯之後任職中銀國際時，為首鋼福山資源（當時叫做福山國際能源集團）進行結構性融資，除咗證券同貸款等形式集資，仲引入首鋼集團做股東，成功收購煤礦資產，從此首鋼福山資源添上國企背景，之後仲做埋首鋼子公司，有利融資發展。

金融海嘯之後要融資唔係易事，所以Wilson話當年咁成功做到一單大交易，多方共贏係相當難忘，估唔到事隔十個寒暑，會同首鋼「再續前緣」。其實Wilson今年出任舊客仔深圳高速公路（00548）獨立董事，已經有「再續前緣」先例，都係念舊之舉。

咁今次係邊個搵Wilson同首鋼「行埋」呢？原來首鋼董事總經理劉東升同Wilson係舊相識，曾經前後腳加盟招商證券（香港），可惜時間上未有機會做同事，今次終於可以共事嘞！

余絲韻