Market Insight：醫藥板塊強勢可持續

如今雙方都話要搵世貿仲裁，公、婆各自說，總之有排煩！資金避險情緒明顯升溫，恒指周三失守30,000點關，插到落29,500點水平，看來短期投資風尚乃「現金為王」！

中美唔係普通細國，貿易量全球舉足輕重，今次真係將貿易分歧放上枱，唔單只中美兩國的企業同消費者以至整體經濟會受到拖累，就連全球經濟亦無法幸免，可以話係冇贏家！咁何解冇着數美國總統「侵侵」都要做？

息口敏感股無運行

有說是「侵侵」認為，畀中國順順利利過到呢幾年的話，經濟實力大增後，將威脅美國，所以如今不惜以本傷人，先搞稅改為本地經濟保底，再就中國作出貿易制裁來拖住中國的後腿。

中國如今處經濟改革的瓶頸階段，呢個時候打貿易戰，當然絕非情願，故見其主要係被動性的見招拆招。咁無論到底係傾唔傾得成，照計中國都係比較蝕章，會唔會引發資金重新審視包括中國等新興市場的前景，從而促使資金流走，值得投資者注視。喺睇清楚局面前，都係奉行少做少錯。

周三北水南來暫停，冇咗呢個力量支持，兩隻大媽愛股騰訊控股（00700）同滙豐控股（00005）都變成地底泥任人踩！騰訊周三終於失守配股價405元，確實令唔少捧場客感到失望，部分選擇止蝕，結果即市下試400元心理關口支持，並告失守，埋單收報397.6元。老實講，本來400元就唔係咩重大支持位，短線確認失守，好可能仲要落多浸，既然走勢明顯轉弱，博短線反彈還是可免則免。

本來，諗住隻大笨象落到250天線附近有得博吓，點知連續幾個交易日皆未能收復此線，技術走勢又係轉弱，大環境利淡，亦無話可說。坐收5厘息的大笨象如是，其他傳統經濟類股份都唔會有好日子過，息口敏感的地產股受貿易戰及加息的雙重夾擊，趁未係大散，重貨的話要把握減持套現機會。

石藥值得長線持有

仍留喺魚缸的資金，可供炒作的板塊選擇唔多，主要集中火力喺內需概念股，勝在未直接受出口不明朗因素影響。假前繼食品股炒過之後，受內地公布符合條件的仿製藥企業可獲減稅的消息帶動，醫藥股都幾熱鬧，上海醫藥（02607）及國藥控股（01099）周三升逾半成、石藥集團（01093）升3%、復星醫藥（02196）及東陽光藥（01558）升2至3%。

醫藥股中，古勝一向鍾情石藥，股價升穿20元後頭也不回，照計喺落實分拆詳情前，長線可繼續持有，但若為短炒，有胡食幾時都唔會係錯，錯就錯在事後有冇需要修正行動啫。

古勝