孖妹S檔案：中資科企回A投資全攻略

陳：Chartwell Capital首席投資總監 陳惠仁

黃：豐盛金融資產管理董事 黃國英

彩兒：市傳有八家在海外上市的中國科企巨頭即將回歸A股，有意發行中國預託證券（CDR）。

Kitty：對內地投資者嚟講，應該係件開心事啦，希望有得用簡易方法買到呢啲科網巨企股份，可以趁住科網熱潮分一杯羹。

陳：無錯！發行CDR先幫到我，減少夜晚擺盤投資ADR（美國預託證券）嘅次數，唔使成日冇覺好瞓。

新經濟企業　科網龍頭短線具爆炸力

Kitty：我早就練成金睛火眼，所以唔介意夠唔夠瞓，最介意冇錢賺。講我知，如果我要炒CDR概念，追入新經濟股份係咪最正路？

黃：啱！我喺三月二十三日大冧市時已經入咗貨。我估阿里巴巴、百度及騰訊股價短線會幾勁。

陳：我覺得騰訊目前估價唔算貴，但佢喺跌市嘅防守力弱，追入騰訊嘅投資者要小心。

Kitty：市傳騰訊會返內地以CDR上市，真定假？

黃：都有可能，不過佢冇呢個逼切性，因為內地投資者透過港股通都可以買騰訊。

豐盛黃國英預料，騰訊股價短線走勢凌厲。

Chartwell Capital陳惠仁贊成發行CDR，因為該制度對亞太區發展有幫助，亦有利中港股市。

A股　茅台見6字頭 恐最受累

Kitty：科網巨企即將回歸A股，大媽會唔會掛住入科網巨企，搞到傳統A股一片死寂？

黃：你有啲道理，我都覺得A股仲會偏弱。最近A股市場明顯轉弱，應該都係由發展CDR所觸發，唔係純粹受貿易戰影響。然而，重磅嘅阿里巴巴入場，仲唔打擊原本嘅股王咩，所以貴州茅台（600519.SH）應該最受影響。貴州茅台股價最近跌穿750元人幣，依家只有600多元人幣。

A股未跌完 宜先行減磅

Kitty：投資者應該清空A股嘅倉？

黃：A股唔識升，大家當然要順勢而行，減持A股。我亦已經大幅減持咗A股倉位，換入預期受惠嘅海外掛牌中資巨企。不過，我估市場今次高估咗CDR擴容速度，所以A股會插得比預期深，等CDR嘅發行及上市細則逐步曝光，亦係撈番A股嘅好時機。不過記住，呢個只係一次過嘅投資機會。

彩兒：有投行分析師估計，嚟緊幾個月CDR嘅細則會出台。當中會提到實際模式，可能係發行新股或掛牌模式等。

陳：無錯，隨時係唔批股，剩係畀多個平台大家交易。例如中國移動（00941）及滙豐控股（00005）喺倫敦掛牌都無批股。

套戥機會　講求快狠準 操作難度高

彩兒：阿里巴巴、百度等新經濟股喺美國都係以ADR形式上市。佢哋CDR同ADR之間嘅差價，有冇得做套戥？

黃：我估CDR股價同ADR股價會出現分歧，CDR股價應該會高啲。若要做套戥，就要做到喺一個市場買，然後搬去另一市場賣。CDR同ADR做套戥係講緊美股同A股兩個市場，要做對等Trade，難度都幾高。情況就類似AH股，點解差價持續存在。

陳：套戥係理論上可行，但實際上難做，因為要計埋股票佣金成本及買賣差價等，而且要求你落盤夠快夠準。咁高要求，真係要程式交易員先做到。

Kitty：點解港股ADR又做到？

黃：因為港股好易沽。

ADR　助企業拓展 具存在價值

Kitty：若CDR交易量比ADR多，企業會唔會放棄ADR？

彩兒：有專家指出，呢啲科網巨企若果放棄ADR係非常唔明智。因為靠ADR，中國企業就可以喺美國融資，然後攞住主要嚟自美國人嘅資金去中國投資，中國投資者及中國企業家都唔使共存亡。

彩兒：如果唔係多得ADR，呢啲科技巨企可唔可以做到依家如此全球化，為人熟悉呢？事實上，唔少科網應用程式，例如支付寶，已成功打入歐洲市場。

A股漸成熟 CDR亦吸引

彩兒：記得當初企業要去美國上市，而唔留番喺中國，係因為企業嘅同股不同權及VIE（可變利益）結構都唔符合A股IPO嘅條件。VIE起源於二○○○年，用途係要規避中國對科技及通訊等特定領域嘅投資限制。相反，美國就有呢種寬限，容許企業大部分在華資產由數位創始人及管理層持有，放棄對其中國分支嘅控制權。當然，股東都可以分享中國業務嘅利潤。

Kitty：CDR與ADR之爭，邊個會贏？

彩兒：要比較吓中美兩個股票市場，邊個更能保障小股東權益喇。

陳：當年科技巨企選擇以ADR喺美國上市，可能因為美國股票市場透明度高啲，畀佢哋嘅估值高啲，但內地股市都漸見成熟，所以CDR都有吸引力。

港股　發行CDR利好中港股市

黃：由於市場擔心阿里巴巴、騰訊、京東及百度等加入CDR後，會搶走客路，所以香港交易所（00388）嘅股價短線會有偏差。

陳：不過，我贊成發行CDR，佢對亞太區發展有幫助，亦有利中港股票市場。我估喺落實CDR同時，會開放一個互聯互通渠道，等香港投資者都可以買CDR，增加投資機會。

Kitty：其實我哋依家都可以直接買美股啦，使乜靠CDR咁轉折。

陳：係嘅，但部分基金投資限於只能買中港上市嘅股票，唔可以買美股。落實CDR，佢哋就唔使申請更改基金嘅投資規定，亦唔使得到基金投資者同意，就可以利用CDR買選擇咗美國做第一上市地嘅科技巨企。

Kitty：你一早申請定得唔得？

陳：有時就係欠缺前瞻性，例如深港通及滬港通開通初期，基金未改得切投資規定，初期未容許買A股，變相蝕咗頭啖湯。

Kitty：直接一啲，邊啲港股可以受惠？

陳：某啲已喺香港上市嘅中國企業，都有可能以CDR再上市。市傳小米會咁做，先喺香港上市，再以CDR喺A股上市。

利用預託證券 投資海外公司

Kitty：點解會有預託證券？

彩兒：因為唔同國籍嘅投資者唔可以喺當地時間參與喺海外上市嘅股票，或者佢哋冇渠道去買，所以金融機構就決定發行預託證券。美國、中國及香港分別發行ADR、CDR及HDR（香港預託證券）。

省卻繁瑣買賣程序

彩兒：另外，如果某公司所在地區嘅法規唔鼓勵將其股份於海外上市，喺香港發行HDR就可以畀呢類公司進入香港嘅資本市場。喺投資者角度，就可以藉着買入呢啲公司嘅HDR，投資於海外公司。

彩兒：原本如果香港投資者要直接投資於境外上市公司股份，通常涉及繁瑣嘅股份登記程序、預扣稅退稅申請，及計算貨幣匯率等，但有咗HDR就唔使再煩呢啲嘢。

Kitty：發行預託證券嘅原理係點？

彩兒：以CDR為例，將境外上市公司發行嘅部分股票託管於當地保管銀行，由中國境內嘅存托銀行發行，再喺A股上市。

彩兒 Kitty