Market Insight：置富產託息高可取

上周四既係三月份最後交易日，亦是基金季結，港股走勢飄忽到暈，早市跌過202點，午後A股帶動逐啲逐啲收復失地，最終升70點收報30,093點。尾市的一抽認真關鍵，令到一七年氣勢如虹的港股，不致肉酸到一踏入一八年第一季就跪低。結果首季恒指保住174點進帳，可惜技術走勢上，自一月見頂後，恒指周線同月線圖已顯著轉弱，中期走勢唔多理想，要舊地重遊攻上一月份創出的33,484點歷史高位，恐怕喺短期內都幾難。

騰訊未必守穩配股價

睇指數重磅股就更不堪，大笨象滙豐控股（00005）老早經已跌穿二月九日，就美國債息飆高環球股市大冧檔當日低位76.26元（已除息），上周四見74元。股王騰訊（00700）亦唔叻得好多，派完一七年度成績表後，翌日（三月二十二日）股價大陰燭由頭隊到尾，可見基金趁好消息紛紛減磅。

當晚連持貨十七年一股都未沽過的大股東南非Naspers都忍唔住參一腳，減持手上2%股份套現769億元，最終以405元上板，比業績前股價462.6元足足平咗12.5%，也將港股推到落三萬點整數關口邊緣掙扎。

上周四騰訊落到405.2元即見反彈，一來接貨者應該無打算咁快就輸住離場有關，跌近臨界點沽壓有所收斂。不過，現實歸現實，外圍大上大落，假如美國科技股再插多浸，難保騰訊405元的接貨價仲可以守得住。之前炒業績上錯車，固然艇得更深，即使批股接貨的基金，溝貨不成反變蟹，要炒番上去就更唔容易，大環境唔多樂觀。

因為「侵侵」的大美國主義，貿易問題上反覆無常的手段，環球股市風險溢價無疑在上升，最直接影響，是資金對股市樂觀情緒減退，部分回到美債市身上，近排十年期美國國債孳息率已回落至2.8厘樓下。

有條件物色收購項目

香港高息股一族，近兩星期都開始見番些少生氣。當中好息之徒至愛的置富產業信託（00778），上周四見過9.55元，逼近二月初以來高位。話就話近排銀行爭定存，出手闊綽搶到2厘樓上，但相比估計置富產託今年5.5厘的息率，後者仲係吸引。加上去年底以唔錯的價錢賣甩和富薈商場，騰出財政空間，今年大有機會再買嘢，以增加租金收入改善長遠派息。個市風高浪急，想搵啲防守貨坐吓可以諗諗佢。

古勝