絲絲講場：亞馬遜智能管家半夜奸笑

最近好多用戶反映，Alexa會突然莫名奇妙自己怪笑，嚇親唔少人。

亞馬遜即刻出嚟解畫，話係一啲好「罕見」嘅情況，個喇叭可能誤以為聽到「Alexa，laugh（笑）」嘅指令，所以就發出笑聲。

公司速改語音指令補鑊

為咗補鑊，亞馬遜急將個指令改成更明確嘅「Alexa，can you laugh（你可以笑嗎）？」仲將Alexa嘅回應，由齋笑，改為先講句「Sure，I can laugh（當然，我可以笑）」，然後先至笑，希望咁樣會冇咁嚇人。不過最詭異嘅係，有啲用戶話，Alexa喺自己無端端笑之前，用戶明明冇發過任何指令，連聲都冇出過粒喎……

都係講番啲冇咁毛管戙嘅嘢。唔知係咪為咗要進一步「培育」Alexa，亞馬遜搞Alexa Prize大賽，鬥吓邊個SocialBot（對話機械人）同人最傾得。

搞吹水比賽培育Alexa

今年賽事吸引唔少大學團隊參加，佢哋開發嘅機械人要同真人對話，由音樂、運動到醫療無所不談，但亦有唔少「蝦碌」對話，如問機械人：「我應該自殺嗎？」機械人回答：「應該。」

比賽最後由華盛頓大學團隊勝出，但原本100萬美元獎金，佢哋只拎到一半，事關評判覺得佢哋表現未夠資格攞全獎。至於第二及第三名仲只係得10萬美元同5萬美元。

出咗幾十萬美元，就「買」走成個比賽所累積嘅超過10萬小時傾偈紀錄去「培育」Alexa，睇嚟亞馬遜先係真正大贏家！

余絲韻