Market Insight：內需兩大支柱抱期望

大藍籌「藍燈籠」中國移動（00941），股價下試70元關承接，收報70.3元，跌3.1%，成交逾23.8億元，既然橫行區已失守，短線可按計劃耐心等候新上落區的底部支持，如68至70元區域，再謀定後動。同類股中國聯通（00762）跌幅更甚，全日低見9.29元，收報9.36元，跌5.9%；中國電信（00728）跌幅算係相對溫和，都要跌2%報3.35元。

中移未威過照樣陪跌

電訊板塊捱沽，有指與內地擬進一步推動流動通訊普及化，傷到三大流動商荷包有關。但老實講，呢個產業政策方向唔係今日先有，大戶要減磅沽貨唔需要太多理由，只係沒料到近年大市升浪冇份的中移，做咗國指新貴反而畀人沽到反艇，成為大跌市的焦點！

另外，同屬重磅股的騰訊控股（00700）以及香港交易所（00388），昨日雖然隨跌市分別低收2.5%及3%，分別報425元及277.2元，但現價與上月低位（分別為398元及255.2元）仍有距離，若然連呢啲相對強的藍籌後市都紛紛下試上月低位，睇怕恒指呢浪真係有機會下試28,000點水平！

市況反覆向下，昨日又有批恒指牛證被屠，由於輪商發新輪證需時，短線要揀貼價輪證選擇唔多，但買較遠期同價外的又唔係咁合短炒。若想刀仔鋸大樹，忍唔到手，不如改賭「細期」實際啲。

內地話今年目標經濟增長6.5%左右，在中美貿易戰一觸即發之際，能定下此目標唔容易。若然作最壞打算，即中美堅打貿易戰，咁今年中國出口表現難寄厚望，靠的就是以內需來支撐大局。如是者，今年至少有兩個板塊可以有望跑贏大市，分別係汽車股同內房股。

龍頭內房要等啱時機

由於汽車業僱用不少勞工，汽車業保持榮景，有助保持整體就業及消費穩定，而內房股仍是地方政府同銀行命脈，內房市道穩，才有條件守住不發生系統性金融風險的任務。

汽車股唔使多講，古勝仍睇好比亞迪（01211），電池股超威動力（00951）亦可關注。至於內房股，建議大家寧願犧牲一點回報，都要揀財政相對穩健，同有阿爺做大股東的大型內房如中國海外（00688）及華潤置地（01109）。同時，在下再補充一句，內房股只宜在技術上超賣時出手，相信季內會有入市機會。

古勝