絲絲講場：港交所總部大露台歎海景
金管局總部喺IFC（國際金融中心）二期頂樓，香港交易所（00388）亦唔輸蝕，港交所總部新年前由國金一期搬去交易廣場一期頂樓50樓，行政總裁李小加同主席周松崗嘅辦公室都喺呢層。
喺得頂樓，「大地在我腳下」，港交所總部辦公室當然與眾不同！大家睇吓新Office張相，除咗有典型寬敞嘅接待位外，仲特別設有一個百幾二百呎嘅露台，同場加送無敵大海景。原來，呢個係交易廣場頂樓特色，聽聞二期頂樓個露台比一期仲大！
咁個露台要嚟做乜好？絲絲就建議，有嘉賓到訪港交所時，可順便帶佢哋出去欣賞一下香港維港景色！
小加想有專用電梯
不過，最可惜係港交所不能「一氣呵成」，租埋頂樓之下嘅48、49樓等，所以辦公室要分開唔同層數，上上落落成日要轉電梯！難怪小加總裁長遠想有部專用電梯由辦公室直達港交所金融大會堂，不過因為技術原因暫時未能如願！
余絲韻