絲絲講場：蓋茨自爆買過最癲3樣嘢

3億買飛機 食米唔知價

微軟八六年上市，當時蓋茨得32歲就入咗福布斯全球富豪榜。咁後生，銀行戶口就有咁多個零，佢竟然話自己冇乜奢侈嘢想要，淨係緊張出糧畀員工養家喎。

連架波子（保時捷汽車）都冇？「有，有買到！」蓋茨仲認買咗架私人飛機（聽講可載19個客，盛惠約3.1億港元），佢話自己最豪買過嘅，就係呢兩樣。

真係得呢兩樣？佢只不過喺屋企搞間房專跳彈床之嘛，佢話「我間屋天花都幾高」！講番啲貼地嘢，睇吓佢食米知唔知價先。一盒「Rice-A-Roni」即食米賣幾錢？蓋茨答「五美元！」正確答案係一美元！咁洗衣粉呢？「四美元？」實際賣近廿美元！有冇嘢係蓋茨估得貼價？有，係牙線！因為佢成日用。

呢個玩估雜貨價錢環節，蓋茨明顯「堅離地」啦！呢位全球第二富豪話自己最後一次去超市係「好耐以前」，明嘅。

講番即場播嗰段脫褲舞綵排片，睇到在場嘅蓋茨阿女幾開心。睇真啲，查實係Key頭，否則睇怕阿女笑唔出。

余絲韻