絲絲講場：張華峰呻港交所場租貴
港交所（00388）金融大會堂開幕後首個業界大型活動，係下周一舉行嘅證券界新春酒會。但搞手之一嘅立法會議員張華峰大呻，港交所金融大會堂裝修後，租場費貴晒，新春酒會租場開價高達8萬元，經講價先減到6.5萬元，往年未裝修前場租都只不過係兩、三萬元咋。
6.5萬租場 雜費另計
張華峰話，新春酒會都係推廣本港證券市場，並非商業活動，況且港交所主席周松崗同行政總裁李小加到時都會出席做主禮，做乜場租收咁貴啫！仲有，6.5萬元只係租場，搭台費同酒會所有食物都係主辦單位自己包辦，齋搭台費都要10萬元，仲未計食物費用。
今次新春酒會由金融服務界十個組織及張華峰聯合主辦，十個會同張議員都要夾番份。要科水，難怪張議員咁肉緊。
春節去咗賭城剪綵
講番張華峰自己，佢呢個農曆新年假期去咗賭城拉斯維加斯一趟。去賭錢？唔係，只係佢有份嘅一間餐廳喺賭城開分店，所以去剪綵。咁有冇發新年財？佢就話自己只玩拉輪盤。
係人都知，張華峰係388（港交所股份）粉絲。佢話早前股市跌，自己都有撈港交所股份作短線買賣，至於佢另外持有嗰啲港交所股份，就會長揸。
張華峰認為港交所股價仍然有好多因素支持，所以會一直睇好，短期可以上望310元高位咁話喎。
余絲韻