Market Insight：騰訊表現轉趨反覆

滙豐控股（00005）公布業績，去年度列帳基準除稅前利潤遜預期，且今次業績並未有公布新一輪回購計劃詳情，可能是與滙控行政總裁即將卸任有關，相信是有意留待新任行政總裁宣布有關安排。回購欠詳情，滙控股價績後插水，收報80.95元，跌3.1%，捧場客也許有點失望。

大笨象尚未見真章

不過，今年滙控的亞洲業務向好，加上今次未有公布新回購計劃不等於沒有後續安排，借勢調整反可視為低吸機會。周四A股復市，作為大媽愛股，話唔定今日午後大笨象股價才見真章，中長線持貨唔使太「騰雞」，不妨繼續持有博又再一年財息兼收。

相對而言，恒生銀行（00011）業績表現勝滙控，尤其是去年下半年業績，派息亦未令食息一族失望。不過，昨日股價一樣要低收1.6%，收報189.2元，部分原因係長假前股價率先由低位大幅反彈。在預期今年受惠股市暢旺以及財富管理業務向好之下，非利息收入料可保持增長，現價估值雖不算便宜，但有條件繼續較同業享有溢價。

騰訊控股（00700）股價昨日雖曾高見453元，惟之後還是不敵地心吸力，收報445.8元，跌0.27%。古勝昨日同股友團拜，就聽聞一位股友喺360元買入騰訊，升上470元都唔捨得走，其後股價一度震穿400元關，雖然未有喺低位沽貨，但長假前見反彈上418元就雞咁腳走，依家喺度呻笨。散戶經常犯的錯誤係升市高追跌市低沽，股友最終雖仍是獲利離場，但輸掉持貨信心，要再克服心魔上番車並唔容易。

金蝶業務備受看好

回說騰訊，到底狗年走勢如何？昨日都約略提過，三月業績期前股價暫難破頂。若從中長線睇，有別於過去兩年的一帆風順上漲，相信今年更多時間係反覆上落，若手持超平貨作中長線投資，少理波動安坐順風車；但若未持貨，策略則可以短炒波幅為主，即留意當技術指標出現超賣信號，小注人棄我取；當由低位反彈幅度超過15%，就可考慮分批獲利。

同屬科網類股份，不妨睇睇隻金蝶國際（00268），昨日股價逆市升4.6%報5.23元，成交逾1億元。眨吓眼股價已由假前低位4.41元反彈至昨日高位見5.23元，睇勢有機會挑戰一月高位5.5元。券商睇好金蝶與華為在雲業務上的戰略合作，睇好其雲ERP及軟件即服務（SaaS）業務，股價反彈力度相對強有原因。

古勝