絲絲講場：金融大會堂關秦始皇事？

舊年十月二十七日收市後，港交所交易大堂完成歷史使命，場內交易正式畫上句號。原址用咗三個幾月嘅時間，終於完成裝修，新一年以新面貌示人，改名做香港金融大會堂（HKEX Connect Hall），入面仲有個「香港金融博物館」，絲絲尋日參觀嘅時候，竟然發現秦始皇！

古人亮相 小加籲捐展品

香港金融博物館用於展示本港金融市場嘅發展歷史，不過點解會關阿秦始皇嬴政事？原來因為佢當年統一度量衡同貨幣制度！博物館入面其中一部分係講中國金融史，連埋秦始皇，總共有十位古代人物「亮相」，連近代啲嘅袁世凱亦有份出場。

館內解埋畀你知香港金融發展同秦始皇嬴政（中）有咩關係。	博物館入面有唔少展板，香港金融歷史一次過畀晒你睇。	展品當然唔少得編號38「橙背心」同出市員嘅「紅背心」。

有古代人，當然都有「現代人」啦！由於博物館主題係圍繞香港金融市場歷史同未來，由1840年代至今嘅金融市場大市、港交所歷史等，統統都有介紹，當中亦包括一啲對香港市場有影響力、大家相當熟悉嘅「現代人」。邊啲？留番畀閣下去參觀時數數。

睇住呢啲交易時用嘅終端機，好回味以往嘅交易大堂啊！

香港金融大會堂入面裝咗個超巨型弧形LED電子屏幕。

至於展品方面，當然唔少得俗稱「紅衫仔」嘅出市員件「紅背心」，仲有老行尊蔡陳葆心、編號38「橙背心」。

博物館內嘅展品暫時未齊，港交所行政總裁李小加尋日喺台上介紹時，都話展品有待增加，仲呼籲大家有好嘢就拎出嚟畀佢哋，一定會搵個好地方放出嚟展出！

巨型LED屏幕直播市況

其實博物館預計三月底先正式開幕，尋日見到展板上都有「工程進行中」、「內容審閱中」等告示，博物館內最終有咩具歷史意義嘅展品，就留待大家稍後去發掘！

另外，香港金融大會堂扮靚靚之後，入面仲裝咗個超巨型弧形LED電子屏幕，全日直播即時市場數據，仲有270度投影牆等。而其中一個入口，以本地藝術家吳燕玲嘅雕塑作品「滙」作為裝飾，所以除咗金融味，仲有藝術Feel o架！

余絲韻