孖妹S檔案：債息未夠高 美股會再升

Ralph：技術分析教父 Ralph Acampora

論股災因由

程式交易為「幕後黑手」

Kitty：天氣不似預期，但要走總要飛……

彩兒：凍又有咩好怕喎！有我喺度畀溫暖你。

Kitty：錯晒錯晒，你今次幫我唔到。股場失意，輸咗嘅錢點都唔會返嚟。

彩兒：我就話幫唔到你，但有個人可能得。Ralph Acampora係華爾街最受尊敬嘅技術分析師之一，佢擁有超過五十年投資經驗，係市場分析發展嘅先驅，係全球響噹噹嘅技術分析師同市場歷史學家。

Kitty：教父救救我！今次跌市真係好奇怪，點會估到，美股波動性低，原來就係暴風雨嘅先兆。另外，一向係喺壞消息之下，股市先冧嘛，點知原來好消息都會搞出個小股災。

道瓊斯工業平均指數由26,616點歷史高位，挫約一成；反映市場恐慌情緒嘅VIX指數由年初9.15低位，飆升逾三成，創一五年以來新高。

「技術分析教父」Ralph Acampora小檔案

股災降臨 孖妹搵金融大師打救

恐慌性拋售動機難測

彩兒：對於今次跌市原因，市場有幾個講法。美國非農就業數據強勁，薪酬增長速度超出預期，係自○九年以來最快，所以市場擔心加息步伐加快，因而引發恐慌性拋售；債息升勢過急；程式沽盤交易湧現；以及美股升咗近九年，升得過多，係時候回一回。

Ralph：坦白講，呢次跌市都令我好困惑。我估係由程式交易操控，但我搵唔出恐慌性拋售嘅背後動機，我唔覺得股份基本面有問題，亦唔覺得美國經濟轉差。

彩兒：你係咪覺得今次嘅市場反應非常之唔理性呢？

Ralph：市場擔心美國聯儲局或會愈嚟愈進取，加快加息步伐，當然十分正常。然而，對於美國十年期國債息率升至近3厘，雖然話係四年內最高，但大家似乎反應過敏咗。

Kitty：點可以唔驚？債息抽高，意味低息環境快成過去，企業融資成本增加，盈利能力減弱。冇盈利支持，股價點會好？股市仲唔跌？

彩兒：我唔認同！你睇吓過去聯儲局貨幣政策周期同股市表現嘅關係先啦。喺加息周期，美股往往反覆向上；相反，喺減息周期，美股偏軟。因為加息大前提，係要經濟好；既然經濟好，股市照道理應該暢旺啲。相反，如果經濟差，企業盈利表現差，聯儲局先至有需要減息，放啲熱錢出嚟提振。

倘累跌兩成仍屬樂觀

Ralph：另外，歷史可以話我哋知，債息要到5厘或以上，牛市先會玩完。我覺得債息會繼續升，但上升速度唔會好似大家諗咁快。

Kitty：你覺得美股同港股係咪快反彈，重拾升軌？

Ralph：Right！雖然股市呢兩個禮拜跌得甘，累跌超過10%，亦唔排除會累跌20%或再多，但我對今年全年嘅股市表現仍有好大信心。

教技術分析

股份見底反彈 不妨博

Kitty：好感動！教父預期股市會反彈，希望我買嘅股份都就快返家鄉。

Ralph：得嘅。早排未跌市前，我講過一八年環球股市會超好，好到我自己都要坐低冷靜吓！呢句說話我未收番。我依然估計，道指喺今年內會升至28,700點。

彩兒：從基本面分析，點解咁睇好？

Ralph：美國總統特朗普兌現部分競選承諾，包括減稅及放寬監管，就係名副其實嘅「資本主義再生」。情況促使聯儲局喺未來幾十年繼續加息，債息持續攀升。我估計，資金遲早會由債市流入股市，進一步延長牛市。

美國年內料加息三次

彩兒：美國今年會加幾多次息？

Ralph：三次啦！目前聯邦基金利率維持於1.25至1.5厘，若今年再加息三次，每次0.25厘，即利率區間會調高到2至2.25厘。

彩兒：中國同美國經濟，你又點睇？

Ralph：中國同美國經濟都超級好。我要重申，今次拋售唔關經濟事。

彩兒：技術層面分析呢？

Ralph：自從○九年三月，美股開展一個長期牛市，預計可以長達足足廿年，所以美股仲有排升，我哋仲有排玩。當然，我又冇話會直線向上，中途難免有大漲小回，我會好好把握回調嘅時候入市。

睇好IBM及埃克森美孚

Ralph：此外，喺一七年全年，科技股由頭帶到落尾；喺一七年下半年，能源同金融股開始反彈；最近連消費類股份都開始追落後。呢個循環好鬼堅，睇嚟股市仲有排癲。

彩兒：一八年邊啲美股最值得投資？

Ralph：我睇好IBM（美股：IBM）同埃克森美孚（美股：XOM），佢哋喺一七年表現唔算好，今年有望做番領頭羊。美國石油公司哈利伯頓（Halliburton）（美股：HAL）都會有排升。另外，美國銀行（美股：BAC）都唔錯，我都諗緊買入，然後擺埋一邊，相信五年後嘅回報會有驚喜！

Kitty：教父一面倒睇好，搞到我開始懷疑。

彩兒：貴為技術分析教父，佢嘅足迹早就暴露晒。佢上個月都有入貨，買咗埃克森美孚及哈利伯頓等。所以，佢係好老實同你分享個人觀點，畀你參考。記住，話明預測，即唔係實啱。

Kitty：依家係咪低撈好時機？

Ralph：我會等個市冇咁波動嘅時候再入市，到時會狂掃金融及科技股，另外，我睇好能源同醫療股。大家都應該跟吓我，等等先。

彩兒：你點做技術分析？可唔可以教我兩招？

Ralph：我留意趨勢，如果我見到股份跌到底，仲見到佢開始反彈，我就會買。佢尋底尋得愈耐，我就愈進取。

Kitty：我知喇。搵一個Big Bottom！哈哈！

透視比特幣

恐未跌完 止賺管控風險

Kitty：全球小股災，就連虛擬貨幣都難獨善其身。

彩兒：虛擬貨幣炒風席捲全球，比特幣一七年表現跑贏全球，回報率逾12.78倍，風頭曾一時無兩。不過，最近受全球監管加強所拖累，比特幣一跌再跌，曾失守6,000美元，真係冇眼睇。

Ralph：我覺得仲有得跌，如果再創新低，我就會止賺先。投資咩都係，最緊要風險管理。

教父威水史

曾批中道指見7千 公司獎跑車

彩兒：你喺華爾街打滾咗超過五十年，最難忘嘅投資經歷係咩？

Ralph：九五年六月，我寫咗份58版嘅report，名為「Dow 7000」，嗰時道瓊斯工業平均指數只有4,000點。到九七年，道指真係飆到7,000點，我開心到飛起。公司當時獎勵我，送咗一份大禮畀我，係我最夢寐以求嘅開篷跑車1962 Roman Red Corvette。

彩兒 Kitty