Market Insight：中興布局雲端服務

上周五，美國十年及三十年期國債孳息繼續於高位徘徊，衝穿3厘引發股市骨牌效應的三十年債息收3.13厘，同今浪高位3.16厘僅一步之遙。恐慌指數（VIX）卻由周五即市高位41回到29水平收市，跌13.1%。

美股經歷了兩年內一周最大跌幅後，技術反彈姍姍來遲，周五道指由早市跌500點埋單倒升330點，收報24,190點，由預託證券及新加坡「黑期」預示，今早港股有機會在29,600點附近輕微高開，開始出現短期技術反彈。

短線入市揀強勢股

成也A股、敗也A股，阿爺去槓桿加上大媽班水過年，A股兩融連跌七日，個市即刻如山泥傾瀉一樣，上周五滬綜指再插132點落到3,129點，短短十日跌咗12.5%。上周三，南下北水罕有地出現淨流出8.6億元人仔後，周四、五亦都只得象徵式的16.3億元及5億元人仔淨流入，同破頂前氣氛差一截。即使港股短期反彈，如果北水唔配合（A股即將放假），要有心理準備力度未必好夠。

恒指舊年由22,000點起步，升足一年，近兩星期高位回落一成多，平心而論，唔算得好誇張，如股王騰訊（00700）仲保得住400元關。可是，睇到上周五接近280隻股票創咗一年新低，差不多佔上市公司數目七分一，唔少二、三線股都維持「升就無份，跌就一齊」情況，短期博反彈，諗住快上快落，都係搵番之前基金同北水眷顧的強勢股為宜。

古勝認為，去到現水平，內銀、內險股值博率已經唔錯，今年長線唔睇好，但短線真係跌得夠深的內房股都可以諗下，但只揀華潤置地（01109）、碧桂園（02007）及融創中國（01918）三隻。

加強發展智能交通

月初中興通訊（00763）出咗業績快訊，預告舊年賺45.5億元人仔，比去年同期損23.6億元人仔大幅改善。個市反應唔大，一來中期已賺22.9億元人仔，加埋整體大市已經落緊，業績就更惹唔起股民關心。

近日中興以12.23億元人仔向南京溪軟轉讓子公司中興軟創43.66%股權，自己保留35.19%。套現銀碼唔算大，但引入的南京溪軟合夥人有阿里創投及上海麒維投資中心這些新經濟領域大玩家，估計交易會增加未來與中興的雲端一體化智慧城市交通的合作機會。

走勢上，去年十月中興在28.55至33.2元間浮沉，上周五低見24.75元，抽返上25.75元收市，看來橫行區有一定支持，有消息配合，今日不妨留意。

古勝