絲絲講場：蟹貨紀念鈔 情人節有出路
中銀香港（02388）早前推出嘅紀念鈔燶味濃，大家點各出奇謀將蟹貨甩手？下個星期嘅情人節（二月十四日）係其中一個時機，辦法係……
話說早前中銀香港為慶祝百年行慶，發行咗「百年華誕紀念鈔票」，發行量達500萬張，創歷史新高。不過紀念鈔可以話係燶味十足，金輝錢幣郵票公司負責人陳榮輝輝哥喺紀念鈔發行首日話過唔睇好，仲話紀念鈔號碼有「4」、「7」，炒賣價定會跌破原價，買家要損手離場。
號碼有 「214」 炒高兩倍半
不過凡事唔係絕對，絲絲有一次喺社交網站紀念鈔買賣區，就見到有單張紀念鈔號碼有「4」嘅，竟然有人肯開1,000大洋高價收購，較買入原價288元高近兩倍半！張紀念鈔有咩咁把炮？原來嗰張紀念鈔號碼係「214444」，Sell其諧意，話紀念鈔代表二月十四日咁話喎，寓意「愛你時時、時時刻刻」。
事實上，紀念鈔賣家為咗有個好價錢可謂出盡法寶，就算諗唔到有咩諧音，亦一於發揮創意小宇宙，話說有位賣家話自己手上一張「HK019008」代表「八月十九日」，可以買來送畀嗰日生日嘅朋友咁話。可惜網民似乎唔多受落，留言話「好牽強」，牽強唔牽強就見仁見智喇。
不過計絲絲話，下個星期就係情人節，各位煩緊買咩送畀人？與其成日送花送朱古力咁行貨，今次不妨送銀紙，即係紀念鈔呀。
余絲韻