孖妹S檔案：同股不同權 投資新力量
農曆新年有四日公眾假期，孖妹想趁機同全家去旅行，點知爸爸Say No，出門夢就此幻滅。雖然孖妹冇話撐唔撐民主，但對於今次嘅家庭活動，好唔忿氣冇得一人一票去決定。最近喺金融市場上，亦聽到關於股東投票權嘅熱門議題，就係同股不同權，孖妹真係希望可以客觀分析吓呢個Topic，睇通當中正反論據，再反思何為公平。
具體定義 股份投票權並不相等
謝：香港財務策劃師學會副主席 謝汝康
林：立信德豪會計師事務所董事 林鴻恩
Kitty：農曆新年就到，諗好去邊度玩未？
彩兒：我想去旅行，點知Daddy係都要我留喺香港同佢一齊拜年。
Kitty：你媽咪有冇意見？
彩兒：冇，Daddy話晒事。
Kitty：知唔知咩叫民主，梗係投票決定，少數服從多數。
彩兒：凡事都有兩面。例如香港交易所（00388）上年底終於落實引入嘅同股不同權都係。
謝：反對同股不同權，就同爭取民主好似。港交所引入同股不同權與否，大家都係講緊投資者嘅投票權有冇被剝削。
Kitty：嘻嘻！咩係同股不同權？
彩兒：香港一直奉行嘅係同股同權，即係所有上市公司股東唔理咩身份，主席又好，散戶又好，其持有嘅每一股都享有相同嘅投票權。舉例，你擁有十股，你就有十票投票權。同股不同權就係股份擁有不等值嘅投票權。
市值百億公司成目標
謝：引入同股不同權嘅原意，係想吸引新興產業同創新型公司，提升香港相對於全球其他主要上市地嘅競爭力。港交所決定拓展現行主板上市制度，容許以下三類公司來港上市：第一，尚未有收入嘅生物科技企業；第二，市值最少達100億元嘅同股不同權新經濟公司；第三，已在其他地方上市，市值最少達100億元嘅新經濟公司。
Kitty：100億元，大嘢嚟喎。
謝：其實上市門檻都冇降低到。你哋一定聽過，阿里巴巴喺一三年因為香港不接受以同股不同權架構上市，而轉赴紐約交易所上市。呢件事或促成港交所引入同股不同權，或吸引阿里巴巴、京東等同類中資企業轉投港股懷抱。
林：係，投資市值大啲嘅企業會相對安全，因為唔少機構投資者會入股，甚至加入埋管理層，有佢哋幫手監察，都放心好多。
瞄準初創皆因創辦人
彩兒：點解特別為新興產業同創新型公司修例？
謝：同股不同權嘅公司入面，科技類佔大部分。仲有趣嘅係，唔少美國初創公司都有一個共通點，管理層、創辦人同持有人都係同一個人，係公司嘅靈魂。呢個人有橋冇錢，惟有靠多輪集資，接受唔同條款，例如交換股權。呢個靈魂人物嘅股權自然被攤薄，所以同股不同權就變得好重要，成為一個幾大嘅誘因令佢繼續留低為公司搏命。
林：所以點解，港交所都唔傾向用時間性規限大股東嘅特權權利，且引入同股不同權係大趨勢！雖則傳統一股一票係公平啲，但都冇辦法。
彩兒：啱呀，呢啲初創企業阿頭應該好有腦，有行業專門知識，非常有存在價值！仲有，美國嘅同股不同權制度都冇定時間性，所以如果香港唔跟，就會被比下去。
謝：另一方面，呢啲公司嘅決策速度都係成敗關鍵，一日賣橙，一日賣蘋果，如果次次要去股東大會先至做決定，就會拖慢晒，萬一通過唔到，就死喇。唔知你有冇發現，有啲公司嘅行政總裁同董事局主席係同一個人，都係想加快決策速度。
Kitty：同股不同權似乎有唔少反對聲音。
謝：聽到啦。早喺一五年，反對聲音最強嘅係一啲基金公司，佢哋作為投資者代理人，當然為投資者爭取最大利益。佢哋解釋同股不同權違反社會公平原則，令小股東權益受損。
話雖如此，基金公司平常有冇行使到投票權，走去股東大會為投資者投落呢一票？而呢一票夠唔夠透明，投資者知唔知基金公司投咗未？撇除某啲被動型基金，一早列明唔幫投資者Vote，想專注管理好基金，唔花時間去投票。
Kitty：哎呀，我呢啲小散戶，邊會搵基金公司幫手管理喎！
謝：透過經紀行買都一樣。你係咪好重視呢個投票權先？我有時都會去吓公司股東會，見到只有少數散戶會有呢個責任感去投票，將自己聲音帶入股東大會。另外，我覺得散戶喺選股時，都唔理佢哋係咪同股同權或同股不同權，佢哋更在乎嘅係公司有冇新概念，有冇炒作空間。
Kitty：佢哋可能反駁，行唔行使投票權，跟應唔應該有呢個權係兩回事。
謝：點都好，魚與熊掌不可兼得！
機制助港保持競爭力
林：同股同權，及同股不同權，當中好壞唔可以一刀切，雖然話後者有高啲機會出現唔公平嘅現象，一旦有持份者立心不良，仲要揸住神聖一票，係會難啲制衡，但佢無疑係令香港保持競爭力嘅重要機制。
彩兒：我覺得就算沿用同股同權，其實都有被大股東濫權嘅漏洞，不過一時諗唔到咩例子。
謝：好簡單，如果你係公司董事會主席兼大股東，為求賺盡股息，唔介意犧牲員工福利，自己做埋公司管理層（例如行政總裁），再將自己人工定低啲，公司所有員工薪酬仲唔畀你封頂。
優化制度 盡量平衡大小股東利益
彩兒：喺同股不同權嘅框架下，可以點優化制度？
林：依家可以做嘅，係盡量平衡大股東同小股東嘅利益，例如委任獨立董事時，只容許小股東投票；控制獨立董事人數百分比；涉及關連交易嘅投票，必須一人一票；公司上市後，唔可以再發行新嘅特權股份；通過日落條款，即係若上市後持有特權股份嘅創辦人離任、逝世或轉讓持股，嗰批股份即時變回一股一票。
謝：港交所亦研究緊，喺引入同股不同權時，要求披露基本資料，更要講吓享特權人士喺公司扮演緊咩角色。企業上市前要搵第三方機構去審核公司現狀，另為同股不同權企業設特定編號，以便識別。
引入集體訴訟壞處多
彩兒：我見美國有集體訴訟，提供渠道畀小股東發聲，你覺得香港需唔需要？
林：我唔贊成，因為容許集體訴訟會牽起好多無端、無理訴訟，正因為咁，令唔少原本想去美國做生意嘅企業都卻步。此外，集體訴訟唔單單影響上市公司，仲會影響整個商業社會運作。再者，修例需要幾年時間，難以配合市場經濟發展進程。
未來效應 在港成功掛牌勢炒上
Kitty：我哋依家要做嘅嘢，係咪就係等消息？
彩兒：三月會公布同股不同權相關細則，但具體時間或形式有待落實。恒指公司現正就恒生指數應否納入唔同投票權架構公司進行諮詢，估計第二季進一步公布有關安排。
謝：當公司成功喺港上市，仲被各大指數公司納入為指數成分股，機構投資者包括主動及被動型都會考慮持股，甚至增加比重，到時個市又會迎接一輪熱炒。若國際或本地的機構性投資者，即市場主要參與者「真的」視企業管治或投票權等為最主要的選股因素，對同股不同權的上市公司股份在估值時會作出折讓。
審批過程尤其關鍵
Kitty：呢啲股份有得炒，單係上年十二月中港交所收市後公布創新板諮詢總結，就迎來一輪升浪。
彩兒：分析新舊經濟嘅財務報表有冇特別唔同？
林：都冇咩大分別，但睇新經濟企業，要特別留意其管治、股東操守同企業內部控制嘅有效性。
謝：咪住，仲有一個重要嘅關要過！就係啲公司想喺香港上市，都要上市委員會審批。唔似美國兩大交易所，批慣同股不同權、主營新經濟公司；香港交易所係新手，所以佢哋能唔能夠迅速Pick-up，了解呢類公司嘅商業模式，以至審批過程順唔順利，仍要拭目以待。
Kitty：我成日淨係諗住呢啲公司會被港交所拒諸門外，而冇諗過，公司唔揀香港上市，就因為驚畀新手搞，會拖慢程序，甚至最終得個吉！
彩兒：又唔使自視過低，香港上市係好有吸引力。
Kitty、彩兒