Market Insight：保留實力 勿急於撈底

上周五美國公布一月份就業數據，非農就業職位新增20萬個，比市場預期18萬多，時薪按年升幅2.9%，創下○九年六月以來最大升幅。近期國際油價及大宗商品，在弱美元下愈升愈有，難怪投資者由對通脹復甦樂觀，都轉為擔心通脹過勁的恐慌臨界點出現。

息口快上 基金掟貨

上周五十年期美國國債孳息率升至2.85厘，是一四年一月以來最高。年初債息在2.45厘水平，個多月升得咁急，意味着企業融資成本會上漲，如果企業盈利展望看好，當然可以抵銷，但息口上得咁快，基金通常都係先掟貨而後快，上周五道指急跌665點收報25,520點，短短幾日由高位跌逾千點。

港股夜期低收32,095點，比日市再跌413點，新加坡港股「黑期」插得更低，預示今早恒指失守32,000點關口機會十分之大。純以技術走勢睇 ，今浪恒指由十二月初28,134點起步扶搖直上，一直升至33,484點歷史新高都未見過比較理性的調整，上星期10日線失守，假如今日連20日線32,145點都守唔住，再數落去，好大機會試一試整個5,250點升浪的38.2%回吐，即31,440點附近水平。

與此同時，由於農曆新年關係，二月港股假期多，交易日數少，估計本周中後段，大市成交會更趨淡靜，已飽食遠颺的基金，未必急於入市撈底，大家都好大機會繼續將賺錢貨減磅，保留實力等農曆新年假期過後才再戰缸湖。

今日個市必然風高浪急，揀股上要更加打醒十二分精神。古勝一向鍾情醫藥板塊，趁今日跌市最啱睇吓有冇機會偷雞。

復藥不妨望多兩眼

外電消息話，復星醫藥（02196）下面間上海復宏漢霖生物技術準備下半年來港上市，集資額最少5億美元。上海復宏漢霖在內地醫藥行業名氣唔細，從事癌症及免疫系統疾病的治療，依家復星醫藥持有六成二股權。

睇番復藥股價，上月中見過52.5元歷史新高之後，曾經在50元水平反覆，到上星期遇啱跌市，插落43.7元，高位跌近一成七。上周五股價掂一掂兩個月低位後，跟住A股（600196.SH）反彈，逆市升3.5%收報45.3元，只要唔再穿上周五的43.35元低位，加上子公司上市消息，今日撈底博佢再一次低開高走。

古勝