絲絲講場：蓋茨嚴限仔女篤手機

今時今日周街都係低頭族，行路食飯連去廁所都要篤手機，就算幾咁其身不正嘅家長，都會擔心仔女中手機毒。微軟之父蓋茨原來對仔女用手機科技產品戒律甚嚴，對你應該有啟示。

蓋茨有三個仔女：大女Jennifer已經22歲，二仔Rory今年19歲，細女Phoebe就16歲。當閣下為咗要寶貝贏在起跑線，阿B未讀幼稚園，閣下已經畀部iPad阿B篤時，你勢估唔到蓋茨貴為微軟之父，竟然規定子女要到14歲先准有手機，佢細女只係用咗手機兩年唔夠！

佢仲有條家規，就係嚴禁手機送飯，連仔女喺瞓覺前幾耐要放低部手機，佢亦有限制。食飯時唔畀掂手機？怕且好多人會「生不如死」。

其實蓋茨啲仔女之前睇住啲Friend一個二個有手機，亦有向阿爸抱怨點解自己仲未有，但蓋茨絕對冇心軟，堅守「家法」。查實佢至少冇Keep仔女嘅Facebook密碼，亦未至於似Apple已故前教主喬布斯咁直頭禁止仔女喺屋企用手機科技產品，蓋茨呢位阿爸算係咁！

余絲韻