Market Insight：阻力未破油價暫觀望

回顧一六年，油組嗌晒救命要減產托價，幾經辛苦將油價由26美元，逐步推番上45至55美元之間徘徊。之前國際油價由過百美元一桶隊落嚟，主要基於美國頁岩技術發展成熟，沙特想以推低油價整死北美的頁岩油商，結果未傷敵先傷己，油組國財赤不斷飆升，最後沙特要將國營油公司沙特阿美上市籌旗。

反觀頁岩油產出持續增長，美國由耗油大國變成石油淨輸出國，今日環境同兩年前其實無大分別。美國能源情報署估計，今年美國石油日均產量升至1,000萬桶，同減產後的沙特平起平坐，同樣供應充裕情況，點解兩年後油價有截然不同演繹？遊資過剩應係最合理解釋。

無論如何，油價在一六年初撻落26美元低位前，對上一個高位係一五年62.58美元水平，若今浪油價成功突圍，論走勢當然大把世界，不過如果遇阻回落，今趟升浪有可能只是虛火一道。

淡友難找反撲理由

隔晚美股又升，周四港股重開，完全無意思想放生班淡友，升市火車頭由大落後的「三桶油」接力，恒指升175點收報30,736點，再創今浪收市新高，升市成交亦對辦，全日有1,318億元。

尋日指數高開130點後，早段一度縮番落去無升跌，不過大環境美股唔肯跌，A股返到3,300點樓上，阻力變支持，淡友搵唔到反撲理據，形成個市即使去到30,750點的長期上升通道阻力，都搵唔到調整機會。

蘋果公司「電池門」公關災難，搞到要向果粉「耍淋」兼減價換電先至暫且平息，不過舊機可以換電來續命，意味短期用家換新機的迫切性大幅降低，巴克萊認為換電計劃會令蘋果今年少賣1,600萬部電話。

幾隻手機設備股又再隊過，瑞聲科技（02018）跌1.3%，比亞迪電子（00285）跌1.7%，舜宇光學（02382）跌2.2%，丘鈦科技（01478）跌2.8%，似乎周初的短暫反彈經已結束。

買醫藥股 先考慮市值

近排愈來愈多基金投行睇好中國醫療板塊，認為人均收入改善，人口老化對醫療保健行業提供長期高需求的環境。有唔少分析認為中國市場在原創藥方面，遲早有一日能與歐美巨擘Pfizer、AstraZeneca平起平坐，由以往主要仿製西藥，走到原創新藥的範疇。

之不過，一間藥廠由研發、臨床到藥品交到審批上市，需時極長，而眼見更加有公司立壞心腸，話新藥研發實則炒完一輪消息之後無晒下文，無咁貼市追到實的股友就更難分辦真偽，惟一可以做就係市值唔大唔買，亦唔好將雞蛋放晒一個籃裏面。

古勝幾隻心水股包括石藥集團（01093）、中國生物製藥（01177）及復星醫藥（02196），三股都屬於較具資源作研發投入的企業，想趁墟在醫藥股熱中分一杯羹，可以留意吓。

古勝