Market Insight：環保股有勢唔怕坐

新能源股逐隻炒，前日比亞迪（01211）衝完一浸，尋日70元經已頂到實，逆市跌兩格收68.1元。個市資金炒得咁短，要成功捉到爆升股難度唔細，尋日輪到金風科技（02208）發威，衝過去13.44元逾兩年高位，尾市升6.3%報13.12元。

金風向來見有北水枕住密吸，但除此之外，真係無乜特別因素揀佢。早兩個月花旗出報告唱淡，話一七年風電銷售麻麻，計埋出售風力場盈利都係得9%增長，明年好可能業績下滑，畀「沽售」評級睇9元。只可惜，客觀分析唔及主觀的北水喜好，報告面世後金風幾乎未跌過。

估值低兼概念十足

個市去到3萬點邊，唔少當炒股估值開始貴，反觀環保股炒極估值都係低一截，好似金風只得13倍PE，其實已是賣點之一。中國要同環境污染開戰，相關股份三幾個月例必落一落鑊，數埋十倍八倍PE的基金環保股，有信義光能（00968）、華能新能源（00958）、龍源電力（00916）、華電福新（00816）、京能清潔能源（00579）及綠色動力環保（01330），揀一兩隻坐定定，進可攻退可守，講唔埋會有收穫。

中資重磅股受惠入摩

唔覺唔覺，恒指差336點就可以重返舊地，再挑戰30,199點的十年新高。最重要是，今次同之前攻頂唔同，港股由騰訊（00700）單天保至尊，一隻撐起，到近排有迹象水向低流，由其他股份接棒，二三線股份似乎都有番啲鑊氣。

趁現貨交投靜局，個市會唔會畀大家一個意外驚喜，炒返上3萬點樓上度歲，好快會有答案。一八年的部署，古勝認為年初要睇番中資重磅股，A股恨入摩恨足N咁多年，一八年六月終於如願以償。即使開頭計入MSCI新興市場指數比重都係低，只得2.5%，到九月上到5%，但按其他市場慣例，遲早逐步增加，A股的外資玩家逐步增加是必然會發生。

古勝年初睇好內銀股可以繼續跑出，一來成交深度夠最先受惠的慣性，其次係估值上亦同整體A股或者H股有差距，睇近日建設銀行（00939）比個市更早破頂，工商銀行（01398）亦步亦趨差毫幾子到頂，大孖沙買緊乜？答案都呼之欲出，畫公仔畫到出腸喇。

舜宇散戶未必夠「食力」

尋日內房股繼續熱炒，藍籌碧桂園（02007）炒到細價股一樣，一升就7.9%成為藍籌之冠，華潤置地（01109）升2.6%。騰訊亦交到貨，股價升1.7%，蘋果公司被果粉索賠，周三急插的科技股瑞聲科技（02018）反彈3.7%，舜宇光學（02382）玩拆細股價彈4.6%。

舜宇於明年一月十九日起，每手買賣單位由1,000股改為100股，以尋日收市價計，換句話一手入場費會由9.94萬元大幅降低至9,940元，此舉無疑想引本錢不足的散戶入嚟撐吓場。

強勢股拆細，往往可以火上加油，不過今浪手機設備股隊到散晒至嚟拆，顯然已經過咗黃金機會，散戶都未必夠「食力」，推返市值過千億元的藍籌新貴返高位，坐緊艇都係好好把握反彈機會鬆綁。

古勝