絲絲講場：Apple庫克薪酬超驚嚇！
雖然近排蘋果公司（Apple Inc.）嘅iPhone需求畀人話麻麻哋，但截至九月底止財年，Apple無論收入抑或經營溢利都打破咗內部目標，舵手庫克亦因此可以袋走高達933萬美元嘅年度花紅，較前一年勁增74%，相當和味。
零售硬件阿頭最高薪
睇番前一年，iPhone銷售下跌，中國業務又受挫，搞到財政目標落空，連庫克嘅花紅都跟住縮水。不過，Apple好快重拾雄風，喺一七年財年錄2,292億美元收入同613億美元經營溢利，雙雙超過內部目標。
除咗上述呢筆同業績表現掛鈎嘅花紅外，同年度庫克仲袋走306萬美元底薪，加上早前披露咗嘅有限制股票獎賞8,920萬美元，總薪酬約1.02億美元（約7.96億港元）。而Apple業績達標，庫克五位得力助手包括財務總監Luca Maestri上個財年各袋走311萬美元花紅，連底薪同股票獎賞總薪酬各約2,420萬美元。
之不過，絲絲就估大家未必聽過第二高薪管理層嘅大名！佢就係嚟自Apple最賺錢嘅硬件科技部門高級副總裁Johny Srouji，佢主要負責監控iPhone同Mac機核心處理器設計，係Apple吸金最勁部門嘅靈魂，年度底薪同花紅2,416萬美元，都係爭首席零售總監阿倫特斯（Angela Ahrendts）嘅2,421萬美元少少咋！
外出規定坐私人飛機
另外，Apple披露嘅資料仲首次顯示，庫克喺啱啱過去嘅財年使咗9.31萬美元喺用私人飛機作非公務行程，主要係董事局考慮到庫克身份矚目，規定佢公事定私事都要坐私人飛機，同年度個人保安開支達22.42萬美元。
余絲韻