Market Insight：內銀至少可安坐收息

市況冇咩好做，又睇番吓啲市場數據。翻查股權披露資料，原來中國平安保險（02318）自九月下旬開始4次增持工商銀行（01398），估計增持約4.3億股，涉資逾26億元，所持工行H股最新持股為8%。

騰訊睇定啲至出手

雖然相對於工行的市值，呢批北水唔係多，但亦反映到在一些權重H股與A股仍有一定折讓，自然有北水關照。有「畏高症」唔想冒進沾手股王騰訊（00700），其實坐住大型內銀股都唔失禮，好似工行今年以來股價最多累升四成，息率有4.4厘，至少揸得安心。

講到騰訊，收市價終於失守380元，一下落到376元收市，睇嚟近日公司主席馬化騰話唔想股價升得太高，原來係提晒水畀大家。老實講，正所謂「槍打出頭鳥」，香港經濟又唔係特別好，之前估值偏低大概已得到修正，如今就因為騰訊佔權重大，股價升得太癲，搞到港股指數係咁升，若升到愈嚟愈失真的話，更可能吸引外資大鱷興風作浪，搞亂檔呢條罪都唔細。

當然長線騰訊業務前景仍樂觀，但呢轉大升浪已完，並進入調整期，若高位沽咗又或者未有持貨，不妨等試到個支持位出嚟，橫行一段時間先出手未遲！

細價股再難暴炒

回顧今年魚缸其中一件大事，乃年中一系列細價股爆煲和所謂的「粉塵爆炸」事件，惹來證監會高調搜證和調查，莊家周身蟻！其實，炒作細價股，係香港魚缸的特色之一。以前老牌莊家手法是炒上抽水，然後派發，再待低迷之時供供合合回收貨源，散戶仍樂於參與，皆因細價股價位細合胃口、有莊家維持秩序有流通量「球場」夠大利短炒，可以博刀仔鋸大樹。

然而，近幾年老牌莊家唔少已搵夠退隱，新派莊家嫌玩「大趴地」唔夠暴利，改玩啤殼、炒歸邊放紙鳶，散貨對象唔再係本地散戶，而係大媽。正由於呢類股多數都係貨源歸邊，再將股價乾挾到高一高。

老實講參與的散戶唔會多，但散起水上嚟場面都幾駭人，一旦拉閘就更加冇仇報！所以，今年細價股爆煲事件，講真重傷的老散應該為數唔多，但莊家十個桶得五個蓋，發到個啤殼工場咁大嚟做，如今資金鏈斷裂兼被監管部門盯到實，就唔知點收科。

中港股市明年展望樂觀

除咗莊家股系列之外，唔少其他冇人維持秩序的眾多昔日熱炒的二、三線股，與今年港股大升市無緣，散戶轉唔過嚟，繼續死坐，錯失由北水主導的強勢股升浪，真係無言。

回歸廿年，港股基本上已完成轉莊，即由外資轉由北水主導。嚟緊中美關係，貿易方面各有立場是非多多，惟金融上，市場開放可以將兩者利益歸於一致。從呢一點出發，古勝實在唔覺得已擁有話語權的北水會讓港股大冧，讓外資有機會吸平貨。

近日有消息指，近年內地股指期貨市場運行平穩，嚟緊會加快推進股指期權上市，當對沖風險的機制完善，下一步相信會係重啟A股IPO以及適度放寬券商兩融業務。故撇除美股崩盤、人民幣大幅波動、或地緣政治風險急速升溫等不利因素出現，明年兩地股市展望穩中有進，毋須過於悲觀。若然今年成績大落後，宜及早檢討吓組合選股，順北水之勢而行，期望明年能扭轉弱勢。

古勝