絲絲講場：管13萬億嘅債王一日係點過？
全球最大資產管理公司貝萊德債券部阿頭，負責睇住1.7萬億美元（約13.26萬億港元）債券，佢每日由起身嗰秒開始係點過？佢自爆每日最賺錢嘅買賣黃金時段原來係……點解嘅？
凌晨3點半起身做Trade
呢個人係貝萊德債券部首席投資官Rick Rieder，佢每朝（美國時間）三點半起身就開工。先Check外電機，跟住上Twitter睇新聞同專欄，Check埋電郵就出手Trade。
「我嘅買賣通常集中喺朝早三點半到六點半，因為呢幾個鐘個市傾向反應過度」，換言之，波幅大先有錢賺！
放假睇研究報告係享受
剛才嗰三粒鐘只係Warm Up！佢逢周一朝早六點半就同亞洲團隊開會，到六點五十五分就輪到同佢分布全球嘅成Team人開每日例會。逢周二朝早七點十五分佢要主持投資策略會議，個會睇晒貝萊德旗下所有類別資產。到咗十一點，如果係周一佢就要主持會議研究宏觀嘢。每日到咗中午十二點十五分，佢就要開會傾互惠基金嘅倉位。
佢每月有一個周六、日會朝早四點起身，然後一樣係做嘢，多數係睇圖表認清宏觀大環境，為咗每月由佢Lead嘅環球投資大會做準備。每個周末佢平均工作十至十二個鐘，算係少過平日！
佢都會放假，亦會做啲消閒嘢，就係睇研究報告同商務書！佢話，「我太太話我咁係做嘢，邊係呢！呢啲叫做享受！」
至於幾點瞓，佢完全冇提過，只係話瞓覺其實係嘥時間！
余絲韻