Market Insight：中資電訊股嚴重落後

大戶安排收爐，部分已開始調動倉位，部署下季的心水股，主要係減持部分科技股，轉投落後的優質傳統經濟股。昨日見到內地消費品牌股氣氛都唔錯，兩大啤酒股都有睇頭，華潤啤酒（00291）升逾半成，青島啤酒（00168）升逾6%。

原來高盛同瑞銀都發報告唱好啤酒股，睇嚟外資報告都仲有番啲力水。古勝早前都品評過潤啤同青啤，有持貨中線可以繼續坐定定。

另外，見航空股都有好表現，南航（01055）及東航（00670）升逾3%，中國國航（00753）升2.9%。汽車股吉利汽車（00175）、東風集團（00489）及北京汽車（01958）升2至3%。食住翻兜傳統股條水，可順便睇睇鞍鋼股份（00347），在20日線7.26元附近初現承接，小注一試，博調整完成再試高位，失守7元止蝕。

老實講，如果博一轉傳統經濟股，汽車同消費股都會是目標板塊，但數來數去，今年升浪表現最落後又佔權重大的板塊，都係中資電訊股。

中移隨時燒冷灶

今年中國移動（00941）股價大部分時間在76至85元水平上落，與牛市無緣；中國聯通（00762）A股控股公司股改方案底定，聯通股價算係三隻電訊股之中較為有啲睇頭，由年初8.7元水平反覆升至八月曾高見13.24元，現時股價處11元水平。

至於中國電信（00728），股價係有一定的波幅，但十一月的表現有點令人失望。

聯通受惠啟動股改

平心而論，三大之中，照計聯通係首選，至少同系股改有進展，且在積極籌推5G技術應用。論貼地，應該係中移莫屬，估值其實有吸引力，偏偏如拉牛上樹，好考捧場客耐性，要有心理準備繼續靜坐，但若然有關股改、分拆鐵塔公司上市等消息出現，股價爆發力不容完全抹殺，亦不失為一隻攻守兼備之選。

假設指數已見頂，但又死唔去，其實中移反而開始留意，事關落注亦唔使太擔心再被指數表現拋離太遠。換言之，板塊中，進取選聯通，博燒冷灶揀中移；至於中電信，相對上條件一般，真係有錢流入板塊，都等其餘兩隻炒起先追未遲。

投行測市技巧改善

騰訊昨日低見377元後即現反彈，高位見過397.8元，收報388.4元，升0.88%。理論上，前低位383元不能有失，能夠即市收復，又唔差得晒。不過，點計都好，騰訊呢浪最勇猛的日子經已過去，短期會繼續以整固為主，不利短炒相關衍生工具，因輸時間值，故策略只宜候正股超賣時博反彈。

買定保險講最牛

適逢年尾，又係投行競猜明年恒指目標的時候。瑞銀發表的港股策略報告預計，在基本情況之下，恒指明年底目標睇32,401點，最樂觀可見36,067點，即現水平仍有兩成升幅。至於花旗則預計明年恒指目標見29,500點，最樂觀見31,000點，並睇好本地銀行股。

似乎經過今年大牛市，啲投行都好穩陣，同時講番基本預測同最牛預測，免得單一目標定得太低，輸成條街就唔好睇啦！

古勝