身邊有好多出來做事一段時間的人，尤其是那些讀嗰科唔係做嗰行的朋友，經常都問讀書其實係為咗乜？學的多，學以致用的少。畢業咗咁耐，好多知識都已經還番畀老師！比如我，高中是讀phy、chem、bio的，長大後做了財演，係幾咁風馬牛不相及的事呢！斷估，我個physics阿sir都唔會同班學生講，讀physics的出路係做財演啩？
但你勢估唔到，有一條physics的法則，我到依家都仲記得，還視之為炒股賺錢的金科玉律！佢就係——慣性（inertia）喇。
於力學中，如果你拋出一個波而任它向前滾動，假設地面是無摩擦力的話，那麼個波就會滾到無止境咁遠，而不會停低的。我就是用這一個法則，轉化成強者恒強的定理，來發掘一系列的寶股，包括騰訊（00700）、舜宇光學（02382）同瑞聲科技（02018）。
我相信只要公司的增長持續，每年都deliver到超預期的業績，他們的股價就會無止境咁升，而唔應該估頂的。
騰訊跌穿400元大關，自高位累跌了40蚊！一道道的血肉長城被擊破，好多420蚊撈貨的散戶在嚎哭，當然唔少得，有從200蚊開始睇淡的人在落井下石。我的粉絲之中，不乏有問倉底貨是否都要清的人，怕摸咗騰訊的大頂喎。
我心諗，一隻有高增長慣性，幾年來從未令粉絲失望的績優股，你有咁「好彩」摸得中佢個頂？會唔會比從佢身上賺番筆的難度仲高呀？唔係唔得嘅，除非你黑過墨斗啦（戴返個頭盔先！）
我承認，今日篇文擺到明係同大家遊花園。係咁又點啫？個市日日跌，揸住批好股又唔會賤賣，想分下神嘛，咪寫一些無關痛癢的話題，抽離下囉！
富昌金融研究部總監 譚朗蔚（作者為註冊持牌人士，持有騰訊、舜宇及瑞聲）