Market Insight：港地產股入貨要等

MSCI指數變動刺激基金換貨，加埋騰訊的224億成交，大市交投1,719億創逾兩年新高，大成交下過千隻股票見紅，恒指穿埋10及20日線，絕非吉兆。十二月初市況，頓變迷茫，睇嚟先企住29,000至30,000點之間打好個底，穩住陣腳經已屬於最好的劇情發展。

另一方面，差估署公布香港私樓指數，連升19個月，十月升至342.4，再創紀錄新高。

今浪大落後的地產股，唯獨信置（00083）醒神啲升2%，長實（01113）、新世界（00017）微升，恒地（00012）及新地（00016）仲要跟住個市插水，美國十二月加息幾成定局，近排套息的影響，持續有資金流出港元銀行體系，金管局公布的銀行體系結餘由年初近2,600億，走走吓十月連1,800億都無，得番1,797億元，也牽動拆息市場有回升迹象，息口敏感的地產股短期氣氛多少受影響。

老古都維持無貨睇定先，等埋美國十二月中議息，睇吓係咪仲企硬出年要加三次咁多至諗。

北水傳聞草木皆兵

港股A股化，情緒凌駕基本因素，必然會係市場充斥着謠言傳聞，對股市的殺傷力愈來愈大。近排傳緊內地暫緩審批港股通基金，簡單講，即係北水南來開始限流。唔單止騰訊唔精神，尋日見內地炒家及大媽的愛股，吉利汽車（00175）、中國平安保險（02318）、舜宇光學（02382）以及瑞聲科技（02018）都受消息影響，最傷的瑞聲一日唔見十皮。

到底內地真出手抑或有心人趁借消息，在期指結算後即時發難？睇尋日滬深兩市經港股通淨流入17.3億人仔，比前日32億人仔少，但較周一跌市的9.3億人仔，已經唔算特別奀。

港股由十年前炒直通車高位三萬二撻咗落嚟十年，一直半死不活，多得大半年來北水參與開始活躍，個市先有啲生氣，食得鹹魚抵得渴，要靠北水落嚟掃高個市，難免就接受埋A股大媽快進快出，政策傳聞草木皆兵，隨時殺股民一頸血的新遊戲規則。

中國水務或有驚喜

個股方面，尋日隻中國水務（00855）逆市升2.4%收6.23元，呢隻供水及污水處理股，啱啱份中期成績相當搶眼，半年賺5.37億升25.1%，中資行估全年賺9億多啲。睇中期業績，超額完成機會唔少，預期市盈率10倍左右，破晒位估值仲咁平，基金吼番啲穩陣基建股，或者會有意外驚喜。

另一隻值得留意，是八月染藍，股價炒完兩日之後，在7.54至8.65元之間浮沉近一季的萬洲國際（00288），近排公司開始帶芬佬睇廠，反應點？睇過去幾日股價慢火煎魚咁由7.6元附近推番上嚟，應該係唔錯。近排因為日清上市，食品股開始有人睇番，公仔麵康師傅（00322）同旺旺（00151）下半年都好番唔少，幾隻股票中，萬洲最平，一八年市盈率13倍唔到，只係等幾時升穿十月初阻力位8.65元之後再舞上9至10元。

古勝