絲絲講場:Katy Perry問股神Bitcoin貼士

股神巴菲特點睇Bitcoin(比特幣)?呢個星期美國女歌手Katy Perry去咗巴菲特間旗艦公司巴郡總部朝聖,Katy就當面直接問佢,結果股神話……

去巴郡朝聖 碰杯Sweet爆

話說股神出名至愛可樂,每日平均飲5杯,連食早餐時都唔放過照飲。今回有客到,股神當然招呼Katy去佢部神聖嘅可口可樂機度。同Katy碰杯可樂之餘,股神仲自爆自己部機嘅可樂唔係原裝配方,事關專登落重咗糖漿。

股神出名睇市準,人稱「奧馬哈先知」(巴郡總部就喺奧馬哈市)。一場嚟到,即使有錢如Katy(佢上年賺成3,300萬美元,即是近2.6億港紙!),亦忍唔住問股神攞貼士,股神跟住就喺Katy耳邊細細聲講。

Katy周三喺IG度Post咗同股神嘅合照,仲暗示自己問咗股神點睇虛擬貨幣,但咬耳仔實際講咗啲咩?Katy冇開估。

不過咁,睇番股神最近喺十月對住一班當地學生時,佢公開講過「Bitcoin唔係產生價值嘅資產,係泡沫!」依家連明星喺IG呃Like都要抽Bitcoin水,你話呢!

余絲韻