Market Insight：置富產託更啱收息

尋找吸引項目唔易

昨日焦點股之一領展房產基金（00823），宣布以230億元出售17個商場物業，預料獲利近74億元。昨日朝早開高2.3元，以72.3元歷史新高開出，尾市升幅收窄到只有0.35元報70.35元。

領展唔係第一次將非核心的低回報資產賣走，早前在業績會上，管理層被問到出售資產之後安排，都提過吓話還債、回購同埋投資新項目。以前房委會「監平監賤」質資產落前身領匯，再分拆上市，資產折讓大，長期在低效官僚管理，改善番些少，租金經已大幅飆升。

不過，今時今日香港水浸問題嚴重，仲有北面大大條水喉落嚟香港搶磚頭，要搵租金回報吸引項目唔易，想照辦煮碗，年年搞搞資產提升工程（AEI），裝修吓個商場，租金長加長有就更難上加難。上到70元樓上，回報3.4厘，合理但未至於去到唔買後悔。

若然把現時市場上房託基金（REITs）逐隻秤，主攻私人屋苑商場的置富產業信託（00778）都有5.3厘，收息揀佢好過。

吉汽有機會踩油上

股王騰訊（00700）話收到玩家建議，押後推出已經4,000萬玩家預約的遊戲《光榮使命》。一隻拖低恒指66點，峰迴路轉係唔得又得，傍晚隻Game忽視上架，且看會唔會成為另一隻《王者榮耀》刺激業績勁升。

恒指公司下周一開始，將股王佔恒指比重降至一成，要留意周五尾市會唔會有傻盤唔計價要質隻股王，震郁個市。

此外，吉利汽車（00175）母企收購寶騰及Lotus似乎有眉目，也承諾日後或會向上市公司注入寶騰等持股。吉汽近幾日在30元頂到實，無炒過的吉汽會唔會趁消息發難，今日朝早不妨留意。昨日瑞信調高吉汽一七至一九年每股盈利預測，全年汽車銷售向上修訂，由110萬輛升至120萬輛，主要係啱啱廣州車展開賣的SUV領克01市場反應唔啱，銷售強勁所帶動。

高科技助車企締商機

本月中旬古勝曾品評過內地食品股，指板塊有番啲人氣。睇番隻康師傅控股（00322），過去幾年股價低迷，直至今年下半年才有番啲生氣。唔講唔知，原來一三年起的三年內，內地的方便麵銷量急跌80億包，若以每包售價3元人仔計，即係240億元人仔銷貨值，都咪話唔傷！

方便麵銷量下滑，與內地居民平均生活水平提高，更着重健康和營養有關。加上互聯網應用發展一日千厘，網絡訂購「外賣」的便捷度大大提高，價錢亦不昂貴，有得揀自然唔會選擇以方便麵醫肚。

隨着互聯網的興起，居民生活、產品營銷等都在起着變化，無論係用家、企業抑或投資者，都要明白變化所在，及早作出應對，才不會被新經濟發展所淘汰。應用這個概念在傳統汽車產業，也許電動車、自助駕駛等的話題如今仍有點抽象，但相信不出五至十年，相關的發展會叫投資者眼前一亮，而龐大的中國市場，將會是各大海內外汽車廠商推銷新產品的兵家必爭之地！

古勝