絲絲講場：鷹君爭產風波導火線係……
鷹君集團（00041）羅氏家族大家長羅杜莉君（羅老太）去年底忽然入稟告家族基金嘅信託人滙豐信託，到今年五月再爆出「挾阿媽爭權疑雲」，然後係一幕幕兄弟互相公開指責，連早幾日羅老太98歲賀壽都要分兩場。搞成咁，原來一切源自一五年某個星期一嘅早上……
家族會議有人話「可炒晒你哋」
話說今年六月時羅家六子羅啟瑞曾經以「朋友的夢」為喻，暗指有人迫媽媽羅老太分身家，成為打官司嘅導火線。佢仲提到，事件鬧大係因為一五年發生咗一件「不快事件」，至於係乜嘢事，佢就拒絕透露。不過絲絲最近八到，原來「不快事件」係源自一場家族會議。
聽講佢哋以往逢星期一早上家族都有個慣例，就係兄弟姊妹一齊開工作會議，傾集團嘅公事。點知一五年尾某個星期一早上開會時，有人忽然對同場嘅大家講：「我（有權）可以隨時炒晒你哋！」
做咩咁激？聽聞係有與會者說話上逆咗佢意，佢於是爆出咗呢句，當時大家聽到都好愕然。然後？當然係講番畀羅老太知啦。
然後到一六年，有屋企人同埋家族基金嘅信託人先後建議，拆分羅老太放喺家族基金嘅家產。同年羅老太叫家族基金信託人增持鷹君股票但不獲受理，結果咪搞到羅老太要告上法庭囉。
到咗今年五月鷹君股東大會，86%股東投票反對羅啟瑞重選做公司執董，Out咗出局。究竟邊啲人投票Out佢呢，就不得而知嘞，淨係知道羅啟瑞講番呢件事時話「少少犧牲，為媽媽奔跑，在所不計」。
余絲韻