孖妹S檔案：輪場甜心波動市鬥靚績
恒指升到癲，衝破30,000點大關外，騰訊控股（00700）又升穿400蚊，但好多投資者都揼心口，話錯失咗賺錢機會。孖妹覺得，與其葡萄人哋，不如坐言起行，捐窿捐罅賺番一筆仲好喇！話時話，窩輪及牛熊證向來係刀仔鋸大樹嘅投資工具，孖妹梗係要搭搭訕，向輪場中人八吓財路。唔經唔覺，原來輪場多咗唔少新面孔，真係令孖妹覺得驚喜又驚艷！
卓：瑞銀亞洲股票衍生產品銷售部董事 卓素華（Winni）
蔡：法興證券上市產品銷售部副總裁 蔡秀虹（Eva）
陳：滙豐環球資本市場機構客戶及財富管理銷售亞洲區主任 陳恩因（Kanas）
麥：法巴環球市場部上市衍生產品部 麥穎儀（Jenny）
Kitty：你哋呢排有個資深嘅「輪王」離開咗瑞銀，依家邊個會擔大旗？
彩兒：咁敏感嘅話題，叫人點答你？我淨係知呢排「輪后」當道，你望望就知。
Kitty：呢排個市咁旺，你哋實好忙。
卓︰係呀！個市旺，輪場都好活躍，輪枱好刺激。我經常連水都冇咩點飲，忙住出牛熊證，又忙住接聽投資者嘅查詢。大家都想捕捉住個升勢，賺番啲，投資者打到嚟，都問得好急，所以我哋都要覆得好快。
蔡：港股大市成交旺咗好多，窩輪及牛熊證佔大市成交比例仍維持喺20%，所以兩者成交額都多咗。
騰訊窩輪佔窩輪總成交額大咗，由去年底嘅22.6%，增加至最近嘅36.7%，增幅逾14.1%。騰訊牛熊證佔牛熊證總成交額亦由去年2.7%，增至最近9.6%，增幅超過三倍，相對指數牛熊證嘅佔比就跌咗，明顯今年係多咗人用個股牛熊證部署。
種類多元化迎合口味
Kitty：輪場旺，即係你哋生意多咗喇。
蔡：好自然嘅。既然市場有需求，亦適逢旺市，我哋係出得積極咗，例如高收回水平嘅、唔同年期嘅騰訊牛仔，畀投資者任君選擇。
麥：最近，投資者鍾意啲比較貼價嘅牛熊證，有啲係啱啱出，即日或者隔日已經沽清，所以我哋都出得好密。
彩兒：嘩！同輪后過招，邊個招架得住！
麥：除咗睇市況需求外，我哋亦要衡量對沖風險。如果市況Chok啲，對沖有更高難度，我哋惟有出闊啲。相反，如果係單邊市，我哋就會盡量出啲行使價同收回價比較窄嘅牛熊證，個價格就會相對吸引。
對於一啲焦點個股，我哋有推出唔同到期日嘅窩輪，例如我哋會推出一啲非常價外嘅中國平安保險（02318）窩輪，等個市真係衝到上去，隻輪就相對比較貼價，到時比對市場其他輪，定價亦相對平。
資金唔多 玩輪勝炒股
Kitty：點解啲人唔買正股，要買衍生工具咁麻煩呢？
卓︰淨睇騰訊，因好多投資者都嘆錯失入市機會，騰訊股價二月先200幾蚊，依家升咗成倍，若目前先高追正股，成本大增，所以窩輪變相係一個好選擇，既可以小博大，又可估頂，買佢跌。上個禮拜，恒指衝破30,000點，好多投資者都睇淡後市，買入熊仔同認沽證。我哋即市收回嘅熊仔都見有唔少街貨。
Kitty：佢哋咪蝕好多？
卓︰蝕得多唔多我就唔知。或者佢哋買衍生產品嚟對沖，因唔捨得沽正股，但又驚跌市會輸，咪買番啲熊仔。
睇街貨分布知風險
Kitty：輪場有冇一啲Signal提醒投資者下行風險呢？
卓︰可以參考個股牛熊證街貨分布圖。根據過往經驗，通常個市升，投資者會一路睇熊證；若有一刻，投資者覺得個市升硬，轉睇牛，個市就可能有下跌危機。但依家有大量北水流入，撐住好多大價股，唔知咁睇仲準唔準。
如果喺騰訊街貨入面，牛熊證佔多，我哋會提醒投資者要小心。一旦騰訊嘅股價大幅回落，唔少牛證被收回，發行商就要做解除對沖嘅活動，股價可能再插深啲。
了解操作竅門利部署
彩兒︰新股熱潮下，輪場成交有冇急增？
卓︰如果係熱捧嘅新股，如眾安在綫（06060）或閱文集團（00772），佢哋上市嗰陣，內險同騰訊嘅衍生產品都成為焦點。當然唔理閱文上唔上市，騰訊早就搶盡風頭啦。
蔡：係呀，相關牛熊證都受追捧，但發輪都要等一段時間，亦要睇番市場需求。
陳：之前投資者集中炒指數牛熊證，依家個股方面都熱鬧咗。騰訊好多「熊仔」被收回，曾經得番10隻熊仔，但其他個股仲有480幾隻，情況好極端。
彩兒︰有話全民皆股，就係股災先兆。你接聽投資者電話時，有冇陌生電話打嚟？
卓︰近排的確多咗新手玩，由佢哋嘅提問就知，佢哋會問入門方法。
麥：輪證參與者愈嚟愈多元化，以前主要係中年逾40歲嘅人士，但近年亦見多咗20幾歲嘅後生仔。
Kitty：依家點炒輪先可以發達？
麥：喺旺市淡市，輪場都有唔同機遇。淡市時，我哋會教投資者點樣倍大收益；依家市旺，我哋會教佢哋點把握重磅藍籌股嘅熱潮，用技術分析入市。
彩兒： 我好怕買咗嘅牛熊證被收回。
麥：睇你想逆市捕捉淡倉，定係順市炒。逆市操作風險相對大。買入恒指牛熊證時，盡量揀啲遠價啲嘅，就冇咁容易被收回。另外，要按市況波幅做調整。不過，我哋推銷畀投資者嘅產品，多數會有500點或以上嘅差價。好似呢兩日嘅市咁Chok，一日升500幾點，第二日早上又升多300幾點，若果你係短炒，揀相差逾700點嘅就啱喇。如果諗住揸多陣，揀再闊啲嘅會比較好。否則你嘅熊仔被收回之餘，其收回價與行使價相差嘅剩餘值，亦會凍過水。
散戶更精明 識買輪對沖
孖妹聽瑞銀卓素華講，近期輪場多咗好多新手炒輪，死喇！呢個現象係咪表示股災將至？法興蔡秀虹就認為唔使太驚！仲話：「我哋都經歷過好多風風雨雨，都安然度過；數數手指，我都做咗十幾年，冇咩話憂唔憂慮。再者，我哋公司都好肯花資源，畀我哋去諗新產品。」
法巴麥穎儀亦認同，話近年輪證市場愈嚟愈成熟，投資者對輪證嘅了解加深咗，投資更理性，清楚自己投資目標，例如識買窩輪嚟對沖正股風險。
學會控制槓桿倍數
佢又話：「見到唔少投資者識止賺離場，且現時恒指牛熊證重貨區都係距離現貨水平有五百點嘅水位，所以喺揀牛熊證方面有好大進步。愈嚟愈少人玩末日輪，其槓桿普遍較高，升跌幅較大，風險倍大，依家多數投資者會識控制槓桿倍數。」
若有料報畀彩兒同Kitty或有嘢問，可電郵money.biz@on.cc
Kitty 彩兒