Market Insight：四環醫藥現轉勢信號

當炒股抖氣，市場資金無顯著流出迹象，開始搵落後股落鑊。藥業股中，上周五石四藥（02005）創新高，石藥集團（01093）、國藥控股（01099）都有進帳。不過，最一鳴驚人的，必然係四環醫藥（00460），一升就14.7%，收報2.88元，一口氣升穿10日、20日、50日及250日線。

下半年四環股價走勢，幾乎完全同個市脫節，五月股價在3.63元見頂之後，陰陰乾，上周二個市作勢撲擊三萬點，當日仲要跌到2.41元，穿埋今年三月起步位2.48元。

舊年開始到今年四月，四環密密回購，由2元邊一直買到上3.34元。除了公司高管睇好之外，都諗唔到其他理由。上半年四環業績表現也對辦，賺8.42億元人仔，按年升14%，一七年預測市盈率得12至13倍，一啲都唔貴。

若然一直等股價跌停先敢上車，上星期的大成交逆轉，似乎出現咗重要轉勢信號，中短線可以睇高一線。

股民要預定賺頭蝕尾

上周四美國感恩節假期休市，周五的港股基本係為前一日跌市打修正球，恒指反彈158點，收報29,866點。年尾內地例牌水緊，A股連插兩日後，周五滬綜指一度跌穿3,337點頭肩頂頸線，雖然最終拗腰回升證實虛驚一場，不過，大媽們自顧不暇，滬深兩市經港股通淨流入資金縮到得12.2億元人仔，是近兩個月升浪以來未見。在今日成也北水，敗也北水的環境下，仲有得彈算係咁。

近日網絡有句順口溜：「問君能有幾多愁，沒買騰訊沒買樓」。在近年的股樓市狂潮，若兩手空空乜都無，的確係在這種十年難逢一遇的狂潮下，難免是恨得牙癢癢。

股民二百唔信，三百唔信，衝上四百後突然間通街騰訊專家，個個都想趕上資產盛宴尾班車，睇落個市有啲牙煙。不過，歷來股市最狂一浪，往往升幅最大，最為誘人，既然叫大家唔衝必然唔啱聽亦唔會聽，古勝倒不如建議大家做心理準備，要預咗尾注揩番鑊甘，但記緊到時要識止蝕仲實際。

騰訊市值不斷膨脹

家陣做分析員，為咗要鬥搶收視，出報告唔係鬥快就要鬥誇，如果今日出報告仲講緊騰訊目標價睇460元，相信報告出街唔使一陣，已經畀基金經理直接由inbox拉落垃圾桶。

將躋身巨無霸三甲

街上叫價最高的花旗，目標價睇606元，唔夠兩星期就被大摩挑機，新目標吹到上628元，唔好問古勝點解，實際有乜咁正，意義唔大。不過，如果騰訊真係上到呢個喜馬拉雅山之巔，市值6萬億元或者7,715億美元，市值將會同8,982億美元的蘋果公司、7,240億美元的Google母公司Alphabet分庭抗禮，打入全球巨無霸三甲之列。

三間公司中，騰訊預期市盈率53倍，而另外兩間只係14倍及20.7倍，你話貴咩？大把人話抵買，總之有貨的，在下替你高興，無貨就不如慳番啖氣暖吓肚。

古勝