絲絲講場：Tesla每分鐘燒錢六萬 快過超跑
電動車商Tesla（特斯拉）上周發布新一代Roadster電動超級跑車，兩秒內可由靜止加速至時速100公里，舵手馬斯克仲自讚係有史以來最快嘅量產超跑，燃油跑車簡直慢如蒸汽火車咁話。查實講到快，有樣仲勁，就係佢哋公司嘅燒錢速度！
公司Cash用到出年乾塘
外媒幫Tesla計數，過去一年平均每小時燒錢48萬美元（約374萬港元），計落即是每分鐘燒成6.24萬蚊港紙！照咁計落去，以公司現時所持Cash，到明年八月六日凌晨2點17分就乾塘（若閣下講究精準，咁講埋，係美國紐約時間）！
有分析員話Tesla渴水到癲，睇明年中前至少要班到20億美元新資金，先可以捱到落去，否則……
難怪佢哋連超跑Roadster與電動重型貨車Semi嘅交付日期未定就急於接受預訂，務求訂金先袋落袋，大小通吃。
要撲水可以發行債券，但佢哋早三個月發嗰批已經潛咗水，再發睇怕未必有人吼。仲有發行股份同可換股債券融資囉，但佢哋位強人老闆馬斯克捨唔捨得自己嘅股權被攤薄呢？
余絲韻