絲絲講場：四叔豪捐十億賀恒指破關
恒基地產（00012）主席李兆基（四叔）早年喺自傳中承諾，如果恒生指數升到三萬點，佢老人家嘅願望係每年捐十億元做公益慈善。依家真係到三萬點，「四叔」李兆基不單止牙齒當金使，已經確定會捐十億出來，仲好快手咁已經同緊十間慈善機構或者學院傾一啲慈善項目。
「搵錢使錢都要成功」
四叔其實喺一五年公開解釋過呢個十億捐款條數點計。佢話恒指若上到三萬點，佢嘅財富都會增加，「每年捐十億都無所謂，我嘅意願係搵錢又要成功，使錢又要成功。」佢早幾年仲講過，如果恒指上到四萬點，捐款會倍增。
四叔經常出口成金句，所謂「使錢要成功」，就係做慈善同做生意一樣，「出一分錢，要有十分收穫」，發揮「四兩撥千斤」嘅原理，希望愈多人受惠愈好。若以每人資助一萬元計，十億元捐款就令十萬人受惠。
不過呢，四叔都曾經講過自己年紀大，所以就算退休都唔會親自打理慈善基金，將會交由專人代理。根據恒地公關部所講，會深入研究嗰十個傾緊嘅慈善項目，相信有部分可以好快落實，並唔排除未來幾日會有更多團體向佢哋建議慈善項目添。
余絲韻